കോഴിക്കോട്: പാര്‍ട്ടി വിലക്കിയ 'കണ്ണൂരിന്‍ താരകമല്ലോ, ചെഞ്ചോരപ്പൊാന്‍കതിരല്ലോ, നാടിന്‍ നെടുനായകനല്ലോ, പി. ജയരാജന്‍ ധീരസഖാവ്...' എന്ന പാട്ടാണ് വടകരയില്‍ പി. ജയരാജന്റെ തെരഞ്ഞെടുപ്പ് പ്രചാരണ ഗാനം.
സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പങ്കെടുക്കുന്ന പൊതുയോഗത്തിനു മുന്‍പു പോലും ഉയരുന്നത് ഈ 'വിപ്ലവ'ഗാനമാണ്.
വ്യക്തിപൂജ ആരോപണത്തിന്റെ പേരില്‍ പാര്‍ട്ടി വിലക്കിയ ഈ ഗാനം തെരഞ്ഞെുപ്പ് പ്രചാരണത്തിന് ഉപയോഗിക്കാമോയെന്നാണ് ഒരു വിഭാഗത്തിന്റെ ചോദ്യം. എന്നാല്‍ സ്ഥാനാര്‍ഥിയുടെ പ്രചാരണത്തിനായി ഇത്തരം ഗാനങ്ങള്‍ ഉപയോഗിക്കാമെന്നാണ് ജയരാജന്‍ അനുകൂലികളുടെ മറുപടി.
എന്തായാലും വ്യക്തിപൂജ ആരോപണത്തെ തുടര്‍ന്ന് വിവാദമാകുകയും പാര്‍ട്ടി നിര്‍ദേശത്തെ തുടര്‍ന്ന് പിന്‍വലിക്കുകയും ചെയ്ത ഈ ഗാനം ഇപ്പോള്‍ പാര്‍ട്ടി അണികള്‍ക്കും നേതാക്കള്‍ക്കും വടകരയിലെത്തിയാല്‍ ആവോളം ആസ്വദിക്കാം.
കഴിഞ്ഞ പാര്‍ട്ടി സമ്മേളന കാലത്താണ് ജയരാജന് ഈ പാട്ട് വിനയായത്. ജയരാജനെ പ്രകീര്‍ത്തിക്കുന്ന പാട്ട് ഇറക്കിയെന്നറിഞ്ഞിട്ടും ഇതു തടയാന്‍ ജയരാജന്‍ ശ്രമിച്ചില്ലെന്നായിരുന്നു പാര്‍ട്ടി വേദിയിലെ വിമര്‍ശനം. കണ്ണൂരിലെ പുറച്ചേരി ഗ്രാമീണ വായനശാലയായിരുന്നു ഈ ഗാനം ചിട്ടപ്പെടുത്തിയ ആല്‍ബം ഇറക്കിയത്. വ്യക്തിപൂജ വിലക്കിയ സി.പി.എമ്മില്‍ ജയരാജനെ പ്രകീര്‍ത്തിച്ചു പാടുന്നതായിരുന്നു ഗാനം.
ഗാനം വിവാദമായതോടെ ജയരാജനെ പാര്‍ട്ടി ശാസിച്ചു. എന്നാല്‍ ജയരാജന്‍ സ്ഥാനാര്‍ഥിയായതോടെ വടകരയിലെ പാര്‍ട്ടി പ്രചാരണ വേദികളില്‍ 'കണ്ണൂരിന്‍ താരകം' പതിവായി. എന്തായാലും പാര്‍ട്ടി സംസ്ഥാന സമിതിയില്‍ പാട്ടിനെ വിമര്‍ശിച്ച നേതാക്കള്‍ ഇപ്പോള്‍ പാട്ടിനൊത്ത് താളമിടുകയാണ്.