ചക്കരക്കല്‍: അനുവദിച്ചതിലും കൂടുതല്‍ വിദ്യാര്‍ഥികളുമായി സര്‍വിസ് നടത്തിയ സ്‌കൂള്‍ ബസ് പൊലിസ് പിടിച്ചെടുത്തു. ഇന്നലെ രാവിലെ ഒന്‍പതോടെയാണ് സംഭവം. മൗവഞ്ചേരിക്ക് സമീപം ചെമ്പിലോട് ഹയര്‍സെക്കന്‍ഡറി സ്‌കൂളിന്റെ ഒരു വാഹനമാണ് ചക്കരക്കല്‍ എസ്.ഐ ബിജുവും സംഘവും നടത്തിയ പരിശോധനയില്‍ പിടിച്ചെടുത്തത്. രാവിലെ നടത്തിയ പരിശോധനയില്‍ ചെമ്പിലോട് സ്‌കൂളിലെ വിദ്യാര്‍ഥികളെ കയറ്റിയ ബസ് വന്നപ്പോള്‍ ഡ്രൈവറോട് കുട്ടികളെ സ്‌കൂളില്‍ എത്തിച്ചശേഷം ലൈസന്‍സും മറ്റു രേഖകളുമായി ചക്കരക്കല്‍ സ്റ്റേഷനില്‍ എത്താന്‍ ആവശ്യപ്പെട്ടിരുന്നു. ഇതിനു പിന്നാലെ ഇതേസ്‌കൂളിന്റെ മറ്റൊരു ബസ് കൂടി എത്തിയപ്പോള്‍ പരിശോധിച്ചതിനെ തുടര്‍ന്ന് 47 സീറ്റുകള്‍ മാത്രമുള്ള ബസില്‍ 126ഓളം വിദ്യാര്‍ഥികളെ കയറ്റിയതായി മനസിലായി. തുടര്‍ന്ന് ഇതിലെ ഡ്രൈവറോടും രേഖകളുമായി സ്‌റ്റേഷനിലെത്താന്‍ ആവശ്യപ്പെട്ടു. എന്നാല്‍ ഡ്രൈവര്‍ വിദ്യാര്‍ഥികളെ തെരുവില്‍ ഇറക്കിവിടുകയായിരുന്നുവെന്നും പൊലിസ് പറഞ്ഞു. തുടര്‍ന്ന് ഈ ബസ് പൊലിസ് പിടിച്ചെടുത്ത് സ്റ്റേഷനിലേക്ക് മാറ്റി. ഡ്രൈവറുടെ ലൈസന്‍സ് റദ്ദ് ചെയ്യണമെന്നാവശ്യപ്പെട്ട് ആര്‍.ടി.ഒയ്ക്കും ബസിന്റെ പെര്‍മിറ്റ് റദ്ദാക്കണമെന്ന് ആവശ്യപ്പെട്ട് കലക്ടറും എസ്.ഐ റിപ്പോര്‍ട്ട് നല്‍കിയിട്ടുണ്ട്. കൂടാതെ റോഡ് ഗതാഗതം തടസപ്പെടുത്തിയെന്ന് ആരോപിച്ച് ബസ് ഡ്രൈവര്‍ക്കെതിരേ പൊലിസ് കേസെടുത്ത ശേഷം ജാമ്യത്തില്‍ വിട്ടയച്ചു.