കൊച്ചി: ലോക്‌സഭാ തെരഞ്ഞെടുപ്പില്‍ മത്സരിക്കുമെന്ന് സരിത എസ് നായര്‍. എറണാകുളം കളക്ട്രേറ്റിലെത്തിയ സരിത നാമനിര്‍ദ്ദേശ പത്രിക വാങ്ങി മടങ്ങി. എറണാകുളം മണ്ഡലത്തില്‍ ഹൈബി ഈഡനെതിരായാവും താന്‍ മത്സരിക്കുകയെന്നും അവര്‍ അറിയിച്ചു.

കഴിഞ്ഞ തെരഞ്ഞെടുപ്പുകളിലെല്ലാം മിക്ക രാഷ്ട്രീയ പാര്‍ട്ടികളും തന്നെ തട്ടിപ്പു കേസിലെ പ്രതിയെന്നാണ് ആരോപിക്കുന്നത്. എം.പി ആയി പാര്‍ലമെന്റിനകത്ത് പോയിരിക്കാനുള്ള ആഗ്രഹം കൊണ്ടോ കൊതി കൊണ്ടോ അല്ല താന്‍ മത്സരിക്കുന്നത്. പാര്‍ട്ടിയുടെ പിന്തുണയുണ്ടെങ്കില്‍ ഏതു ക്രിമിനലിനും രാജ്യം ഭരിക്കുന്ന ആളായി ഇരിക്കാന്‍ കഴിയും എന്ന സന്ദേശം ജനങ്ങള്‍ക്ക് നല്‍കുന്നതിനു വേണ്ടിയാണ് താന്‍ മത്സരിക്കുന്നതെന്നും സരിത പറഞ്ഞു.