കൊച്ചി: ഗര്‍ഭസ്ഥ ശിശുവിന്റെ അവകാശങ്ങളെക്കാള്‍ കുട്ടിയെ പ്രസവിക്കുന്ന സ്ത്രീയുടെ അവകാശത്തിനാണ് മുന്‍ഗണനയെന്ന് ഹൈക്കോടതി. മാതാവിന്റെ അനാരോഗ്യം ചൂണ്ടിക്കാട്ടി ഗര്‍ഭം അലസിപ്പിക്കണമെന്നാവശ്യപ്പെട്ട് സമര്‍പ്പിച്ച ഹരജിയിലാണ് ജസ്റ്റിസ് ബെച്ചു കുര്യന്‍ തോമസിന്റെ നിരീക്ഷണം.

 1971ലെ മെഡിക്കല്‍ ടെര്‍മിനേഷന്‍ ഓഫ് പ്രഗ്‌നന്‍സി ആക്ട് പ്രകാരം ഗര്‍ഭകാലം 20 ആഴ്ചകള്‍ക്കപ്പുറം പിന്നിട്ടാല്‍ ഗര്‍ഭം അലസിപ്പിക്കല്‍ നിയമപരമായി അനുവദനീയമല്ല. ഈ സാഹചര്യത്തിലാണ് ഹരജിക്കാരിക്ക് കോടതിയെ സമീപിക്കേണ്ടിവന്നത്. ഇരു വൃക്കകളും തകരാറിലായ ഹരജിക്കാരിക്ക് അനുകൂലമായി തീരുമാനമെടുത്ത കോടതി വിധിന്യായത്തില്‍ സ്ത്രീകളുടെ അവകാശങ്ങള്‍ സംബന്ധിച്ചും പരാമര്‍ശിച്ചിട്ടുണ്ട്. 

ഇത്തരം സാഹചര്യങ്ങളില്‍ ഗര്‍ഭാവസ്ഥയില്‍ തുടരണോ അവസാനിപ്പിക്കണോ എന്ന തീരുമാനം അടിസ്ഥാനപരമായി സ്ത്രീയുടെതായിരിക്കണം. അത് അവളുടെ ഭാവിയെ രൂപപ്പെടുത്തുകയും മറ്റ് മനുഷ്യാവകാശങ്ങളെ ബാധിക്കുകയും ചെയ്യുന്ന കാര്യമാണെന്നും കോടതി ചൂണ്ടിക്കാണിച്ചു.