തിരുവനന്തപുരം: കഴിഞ്ഞ ദിവസം കാണാതായ സെക്രട്ടേറിയറ്റ് അണ്ടര്‍ സെക്രട്ടറിയുടെ മൃതദേഹം വാമനപുരം നദിയില്‍ നിന്നു കണ്ടെത്തി. 

സെക്രട്ടേറിയറ്റിലെ റെക്കോര്‍ഡ്‌സ് വിഭാഗം അണ്ടര്‍ സെക്രട്ടറി ചിറയിന്‍കീഴ് ഒറ്റപ്ലാമുക്ക് ഗ്രീഷ്മത്തില്‍ ഇള ദിവാകറിന്റെ (49) മൃതദേഹമാണ് ഇന്നലെ ചിറയിന്‍കീഴിനു സമീപം അയന്തിക്കടവില്‍ നിന്നു കണ്ടെത്തിയത്. വെള്ളിയാഴ്ച പുലര്‍ച്ചെ സ്‌കൂട്ടറില്‍ വീട്ടില്‍ നിന്നു പുറപ്പെട്ടതായിരുന്നു. എങ്ങോട്ടേക്കാണ് പോയതെന്ന് വ്യക്തമല്ലാത്തതിനാല്‍ ബന്ധുക്കള്‍ പൊലിസില്‍ പരാതി നല്‍കിയിരുന്നു. ഉച്ചക്കുശേഷം ചിറയിന്‍കീഴ് അയന്തിക്കടവിനു സമീപം സ്‌കൂട്ടര്‍ ഉപേക്ഷിച്ച നിലയില്‍ കണ്ടെത്തി. 

നദിയില്‍ ചാടിയിട്ടുണ്ടെന്ന നിഗമനത്തില്‍  അഗ്നിരക്ഷാ സേനയുടെ സ്‌കൂബാ ടീം തിരച്ചില്‍ നടത്തിയെങ്കിലും കണ്ടെത്താനായിരുന്നില്ല. ഭര്‍ത്താവിന്റെ മരണത്തോടെ ഇവര്‍ മനോവിഷമത്തിലായിരുന്നുവെന്ന് ചിറയിന്‍കീഴ് പൊലിസ് പറഞ്ഞു. 

മൃതദേഹം ചിറയിന്‍കീഴ് താലൂക്ക് ആശുപത്രി മോര്‍ച്ചറിയില്‍. പരേതനായ ലൈജുവാണ് ഭര്‍ത്താവ്. മക്കള്‍: ഭവ്യ ലൈജു(സബ് എന്‍ജിനീയര്‍, കെ.എസ്.ഇ.ബി പാലച്ചിറ, വര്‍ക്കല), അദീന ലൈജു (പ്ലസ്ടു വിദ്യാര്‍ഥിനി).