കോഴിക്കോട്: എസ്.കെ.എസ്.എസ്.എഫ് വിഖായ അംഗങ്ങള്‍ക്ക് സംസ്ഥാന കമ്മിറ്റിയുടെ ആഭിമുഖ്യത്തില്‍ ഹെല്‍ത്ത്‌കെയര്‍ ഫൗണ്ടേഷന്റെ സഹകരണത്തോടെ ദുരന്തനിവാരണ പരിശീലനം സംഘടിപ്പിച്ചു. 

വെള്ളപ്പൊക്കം, ഉരുള്‍പൊട്ടല്‍, തീപിടിത്തം തുടങ്ങിയ ദുരന്തസ്ഥലങ്ങളില്‍ രക്ഷാപ്രവര്‍ത്തനം നടത്തുന്ന രീതികളെപ്പറ്റിയും പ്രഥമശുശ്രൂഷയെ സംബന്ധിച്ചും വിദഗ്ധര്‍ ക്ലാസെടുത്തു. പാചകവാതക സിലിണ്ടറുകള്‍ക്ക് ചോര്‍ച്ചയുണ്ടാകുമ്പോള്‍ സ്വീകരിക്കേണ്ട മുന്‍കരുതലുകളെപ്പറ്റിയും അംഗങ്ങള്‍ക്ക് പരിശീലനം നല്‍കി.
ഇന്നലെ രാവിലെ മുതല്‍ വൈകിട്ട് വരെ നടന്ന പരിശീലനത്തില്‍ സംസ്ഥാനത്തെ ഇരുന്നൂറോളം വിഖായ സജീവ വളണ്ടിയര്‍മാര്‍ പങ്കെടുത്തു. സമസ്ത ഓഡിറ്റോറിയത്തില്‍ നടന്ന പരിപാടി എസ്.കെ.എസ്.എസ്.എഫ് സംസ്ഥാന അധ്യക്ഷന്‍ സയ്യിദ് ഹമീദലി ശിഹാബ് തങ്ങള്‍ ഉദ്ഘാടനം ചെയ്തു.
മാസ്റ്റര്‍ട്രെയ്‌നര്‍ സജീഷ്‌കുമാര്‍, ഷംസുദ്ദീന്‍, റഷീദ് വയനാട്, അഹമദ് ഷാരിഖ് ആലപ്പുഴ, ഗഫൂര്‍ മുണ്ടുപാറ, എസ്.എം.ബഷീര്‍ മംഗലാപുരം, അന്‍വര്‍ സാദത്ത് കൊല്ലം, മന്‍സൂര്‍, ഷബീര്‍ ബദ്‌രി എന്നിവര്‍ പരിശീലനത്തിന് നേതൃത്വം നല്‍കി.