തൃക്കരിപ്പൂര്‍: ജില്ലാതല അക്കാദമി ഫുട്‌ബോള്‍ ചാംപ്യന്‍ഷിപ്പിന് നാളെ നടക്കാവ് രാജീവ് ഗാന്ധി സിന്തറ്റിക് സ്റ്റേഡിയത്തില്‍ തുടക്കം കുറിക്കും. ഒരുക്കങ്ങള്‍ പൂര്‍ത്തിയായതായി സംഘാടകര്‍ വാര്‍ത്താസമ്മേളനത്തില്‍ അറിയിച്ചു.
അണ്ടര്‍ 10,12,14,16 എന്നീ വിഭാഗങ്ങളിലാണ് മത്സരങ്ങള്‍ നടക്കുക. തൃക്കരിപ്പൂര്‍ ഫുട്‌ബോള്‍ അക്കാദമി, ഇ.കെ നായനാര്‍ ഫുട്‌ബോള്‍ അക്കാദമി, എം.ബി.എം അക്കാദമി മെട്ടമ്മല്‍, ഇ.എഫ്.എ കാലിക്കടവ്, ഫുട്‌ബോള്‍ അക്കാദമി ചെറുവത്തൂര്‍, സോക്കര്‍ അക്കാദമി മടിക്കൈ, സി.ഡി.എ അക്കാദമി ചിറ്റാരിക്കല്‍, വലിയപറമ്പ ഫുട്‌ബോള്‍ അക്കാദമി എന്നീ ടീമുകളാണ് നാലു വിഭാഗങ്ങളിലായി മത്സരിക്കുക. നാലു വിഭാഗങ്ങളിലായി 60 മത്സരങ്ങള്‍ അരങ്ങേറും. ഉദ്ഘാടനത്തിന്റെ ഭാഗമായി നാളെ വൈകിട്ട് നാലിന് തൃക്കരിപ്പൂര്‍ മിനിസ്റ്റേഡിയത്തില്‍നിന്ന് വിവിധ അക്കാദമി കുട്ടികളുടെ ഘോഷയാത്രയും മാര്‍ച്ച് പാസ്റ്റും നടക്കും.
തുടര്‍ന്ന് നടക്കാവ് രാജീവ് ഗാന്ധി സിന്തറ്റിക് സ്റ്റേഡിയത്തില്‍ ചാംപ്യന്‍ഷിപ്പിന്റെ ഉദ്ഘാടനം ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് പി. ഹബീബ് റഹ്മാന്‍ നിര്‍വഹിക്കും.
ജില്ലാ ഫുട്‌ബോള്‍ അസോസിയേഷന്‍ പ്രസിഡന്റ് പി.സി ആസിഫ് മുഖ്യാതിഥിയാകും.
നാളെ നടക്കുന്ന ആദ്യ മത്സരത്തില്‍ അണ്ടര്‍ 14 വിഭാഗത്തില്‍ സോക്കര്‍ അക്കാദമി മടിക്കൈ, സി.ഡി.എ ചിറ്റാരിക്കലുമായി എറ്റുമുട്ടും.
വാര്‍ത്താസമ്മേളനത്തില്‍ കെ.പി.സി മുഹമ്മദ് കുഞ്ഞി, എം. രാമചന്ദ്രന്‍, എം. സജേഷ് കുമാര്‍, മുഹമ്മദ് അസ്ഹറുദ്ദീന്‍, എം. മഹറൂഫ്, എന്‍.കെ.പി സിറാജുദ്ദീന്‍ സംബന്ധിച്ചു.