തിരുവനന്തപുരം: കെ.എസ്.ആര്‍.ടി.സിയുടെ പുതിയ മാനേജിങ് ഡയറക്ടറായി ബിജു പ്രഭാകര്‍ ചുതലയേറ്റു. മുന്‍ സി.എം.ഡി എം. പി ദിനേശില്‍ നിന്നാണ് അദ്ദേഹം ചുമതല ഏറ്റെടുത്തത്. തൊഴിലാളികളെ കൂടി വിശ്വാസത്തിലെടുത്തു കൊണ്ടുള്ള പരിഷ്‌കാരങ്ങളാകും കെ.എസ്.ആര്‍.ടി. സിയില്‍ നടപ്പിലാക്കുന്നതെന്നും വെല്ലുവിളികള്‍ പുതിയ സാധ്യതയായി കണ്ടു മുന്നോട്ടു പോകുമെന്നും അദ്ദേഹം പറഞ്ഞു.
ആര്‍ക്കും തൊഴില്‍ നഷ്ടമുണ്ടാക്കുന്ന സ്ഥിതി ഉണ്ടാകില്ല. കൂടുതല്‍ പേര്‍ക്ക് തൊഴില്‍ നല്‍കുക എന്ന സര്‍ക്കാര്‍ നയം തന്നെയാകും ഇവിടെ നടപ്പിലാക്കുക. കെ.എസ്.ആര്‍.ടി.സിയില്‍ പൂര്‍ണമായും കമ്പ്യൂട്ടര്‍വല്‍ക്കരണം നടപ്പിലാക്കുക എന്നതാണ് ഏറ്റവും പ്രധാനം. മൂന്നു മാസത്തിനകം ഇ ടിക്കറ്റ് നടപ്പിലാക്കും. ജീവനക്കാരുമായി സഹകരിച്ചുള്ള മുന്നേറ്റമാണ് ഉദ്ദേശിക്കുന്നത്. നിലവിലെ സാഹചര്യം കണക്കിലെടുത്താല്‍ മൂന്നു മാസം കൂടി ശമ്പളം നല്‍കാന്‍ സര്‍ക്കാരിന്റെ സഹായം വേണമെന്ന് അദ്ദേഹം പറഞ്ഞു.
പൊതുഗതാഗതത്തില്‍ ലാഭമുണ്ടാക്കുകയെന്നതില്‍ പരിമതിയുണ്ട്. എന്നാല്‍ യാത്രക്കാരെ കൂടുതല്‍ ആകര്‍ഷിച്ച് ലാഭകരമാക്കുന്നതിനുള്ള പദ്ധതിയാണ് ലക്ഷ്യം. അടുത്ത മൂന്നു വര്‍ഷം കൊണ്ട് നേട്ടമുണ്ടാക്കാന്‍ കഴിയുമെന്നാണ് പ്രതീക്ഷ. ബൈക്ക് യാത്രാക്കാരെ ബസുകളിലേയ്ക്ക് ആകര്‍ഷിക്കുന്ന പദ്ധതി തയാറാക്കും. നിലവില്‍ ബസുകളുടെ ലാഭനഷ്ടം എളുപ്പത്തില്‍ മനസിലാക്കാനുള്ള കണക്കെടുപ്പിന് മുന്‍ഗണന നല്‍കും. ജീവനക്കാരെ കുറക്കാതെ നിലവിലുള്ളവരുടെ സേവനം കൂടുതല്‍ ഫലപ്രദമായി ഉപയോഗിക്കാനാണ് തീരുമാനം. രാത്രിയാത്രയില്‍ ദീര്‍ഘദൂര സര്‍വിസുകള്‍ ആരംഭിക്കും.ടിക്കറ്റ് ഇതര വരുമാനം ഉണ്ടാക്കുന്നതിനായുള്ള പദ്ധതികള്‍ കൂടുതല്‍ നടപ്പിലാക്കുമെന്നും അദ്ദേഹം കൂട്ടിച്ചേര്‍ത്തു.