മാഡ്രിഡ്: റയല്‍ മാഡ്രിഡിനായി ക്രിസ്റ്റ്യാനോ റൊണാള്‍ഡോ നേടുന്ന 41ാമത് ഹാട്രിക്കാണ് ബയേണ്‍ മ്യൂണിക്കിനെതിരേ സ്വന്തമാക്കിയത്. ലാ ലിഗയും ചാംപ്യന്‍സ് ലീഗുമടക്കം വിവിധ ടൂര്‍ണമെന്റുകളായിട്ടാണ് താരം ഈ നേട്ടങ്ങള്‍ സ്വന്തമാക്കിയത്.
മാഞ്ചസ്റ്റര്‍ യുനൈറ്റഡില്‍ നിന്ന് 2009ല്‍ സാന്റിയാഗോ ബെര്‍ണാബുവില്‍ എത്തിയതു മുതലുള്ള എട്ടു സീസണുകളിലായിട്ടാണ് താരത്തിന്റെ ഈ അദ്ഭുത നേട്ടം. ഇവയെല്ലാം പകരം വയ്ക്കാനില്ലാത്തതുമാണ്.
2010ല്‍ മാല്ലോര്‍സയ്‌ക്കെതിരേയായിരുന്നു ക്രിസ്റ്റ്യാനോയുടെ ആദ്യ ഹാട്രിക്ക്. ചാംപ്യന്‍സ് ലീഗില്‍ ആറാമത് ഹാട്രിക്കാണ് ബയേണിനെതിരേ സ്വന്തമാക്കിയത്. കോപ്പ ഡെല്‍ റേയില്‍ രണ്ടും ക്ലബ് ഒരു തവണയും താരം ഹാട്രിക്ക് നേടിയിട്ടുണ്ട്. അതേസമയം യുനൈറ്റഡില്‍ കളിക്കുമ്പോള്‍ ഒരിക്കല്‍ മാത്രമാണ് ക്രിസ്റ്റ്യാനോ ഹാട്രിക്ക് സ്വന്തമാക്കിയത്. ലാ ലിഗയില്‍ 32 ഹാട്രിക്കുകളാണ് താരം ഇതുവരെ സ്വന്തമാക്കിയത്.
ഒരു സീസണില്‍ ഏറ്റവുവധികം ഹാട്രിക്ക് നേടുന്ന താരമെന്ന റെക്കോര്‍ഡ് ലയണല്‍ മെസ്സിക്കൊപ്പം പങ്കിടുകയാണ് ക്രിസ്റ്റ്യാനോ. എട്ടു തവണയാണ് ക്രിസ്റ്റ്യാനോ ഒരു സീസണില്‍ ഹാട്രിക്ക് സ്വന്തമാക്കിയത്.