തിരുവനന്തപുരം: കൊവിഡ് ടെസ്റ്റിന്റെ കാര്യത്തില്‍ വി.മുരളീധരന്‍ സ്വന്തം വാക്കുകള്‍ വിഴുങ്ങുകയാണെന്ന് മുഖ്യമന്ത്രി പിണറായി വിജയന്‍. കൊവിഡ് ബാധിച്ച പ്രവാസികളെ ഇങ്ങോട്ട് പ്രവേശിപ്പിക്കില്ല എന്ന് സംസ്ഥാനം ഒരിക്കലും പറഞ്ഞിട്ടില്ലെന്നും എന്നാല്‍ സര്‍ക്കാര്‍ പ്രവാസികള്‍ക്ക് എതിരാണെന്ന ദുരുദ്ദേശപരമായ പ്രചരണം നടത്തുന്നവരുടെ കൂട്ടത്തില്‍ കേന്ദ്ര സഹമന്ത്രി വി.മുരളീധരനുമുണ്ടെന്നും മുഖ്യമന്ത്രി പറഞ്ഞു. രോഗമുള്ളവരെ അവിടെ തന്നെ ചികിത്സിക്കുന്നതാണ് നല്ലതെന്നായിരുന്നു കേന്ദ്ര മന്ത്രിയുടെ മുന്‍നിലപാട്. എന്നാല്‍ അതിന് വിപരീതമായി നിലപാട് മാറുന്ന തരത്തില്‍ എന്ത് അത്ഭുതമാണ് ഇതിനിടയില്‍ സംഭവിച്ചിട്ടുള്ളതെന്ന് മുരളീധരന്‍ വ്യക്തമാക്കണമെന്നും മുഖ്യമന്ത്രി ആവശ്യപ്പെട്ടു.