ചിറ്റാരിക്കാല്‍(കാസര്‍കോട്): വരവില്‍ കവിഞ്ഞ സ്വത്ത് സമ്പാദിച്ചുവെന്ന പരാതിയില്‍ പഞ്ചായത്ത് വൈസ് പ്രസിഡന്റിന്റെ വീട്ടില്‍ വിജിലന്‍സ് റെയ്ഡ് നടത്തി. ഈസ്റ്റ് എളേരി പഞ്ചായത്ത് വൈസ് പ്രസിഡന്റ് ജയിംസ് പന്തമാക്കലിന്റെ വീട്ടിലാണ് റെയ്ഡ് നടന്നത്. കോഴിക്കോട്ടെ വിജിലന്‍സ് വിഭാഗമാണ് ഇന്നലെ രാവിലെ റെയ്ഡ് നടത്തിയത്. ഈസ്റ്റ് എളേരി പഞ്ചായത്തില്‍ വന്‍ അഴിമതികള്‍ നടന്നതായി നേരത്തെ പരാതി ഉണ്ടണ്ടായിരുന്നു. ഇതുമായി ബന്ധപ്പെട്ടാണ് ഇന്നലെ കോഴിക്കോട്ടു നിന്നുള്ള സ്‌പെഷ്യല്‍ വിജിലന്‍സ് സംഘം റെയ്ഡിന് എത്തിയതെന്നാണ് സൂചന. ജയിംസ് പന്തമാക്കലിന്റെ വീട്ടിലും ഓഫിസിലുമാണ് ഒരേ സമയം റെയ്ഡ് നടന്നത്.
അതിനിടെ വിജിലന്‍സ് റെയ്ഡിനിടെ വീട്ടില്‍ നിന്നും 22,000 രൂപ നഷ്ടപ്പെട്ടുവെന്നും പരാതിയും ജെയിംസ് ഉന്നയിച്ചു. കിടപ്പുമുറിയിലെ തുണിക്കിടയില്‍ സൂക്ഷിച്ച 22,000 രൂപ നഷ്ടപ്പെട്ടുവെന്നാണ് ജെയിംസ് പന്തമാക്കല്‍ പൊലിസില്‍ നല്‍കിയ പരാതി. എന്നാല്‍ റെയ്ഡിനെത്തിയ ഉദ്യോഗസ്ഥരെ കുടുക്കാനുള്ള ബോധപൂര്‍വമായ നീക്കമായാണ് വിജിലന്‍സ് ഇതിനെ കാണുന്നത്. 2005 മുതല്‍ പഞ്ചായത്ത് മെമ്പറായും പിന്നീട് വൈസ് വൈസ് പ്രസിഡന്റ്, പ്രസിഡന്റ് എന്നീ പദവികള്‍ വഹിച്ച ജെയിംസ് പന്തമാക്കല്‍ നിലവില്‍ പഞ്ചായത്ത് വൈസ് പ്രസിഡന്റാണ്. ലക്ഷങ്ങള്‍ വില വരുന്ന അനധികൃത സ്വത്തുക്കള്‍ ഇയാള്‍ സമ്പാദിച്ചതായി റെയ്ഡില്‍ കണ്ടെണ്ടത്തിയതായി സൂചനയുണ്ട്. ഇതുമായി ബന്ധപ്പെട്ട രേഖകളും വിജിലന്‍സ് പിടിച്ചെടുത്തു. അതിനിടെ റെയ്ഡ് വിവരം അറിഞ്ഞെത്തിയ മാധ്യമ പ്രവര്‍ത്തകരെ ഭീഷണിപ്പെടുത്തിയതായും പരാതിയുണ്ട്.
കോണ്‍ഗ്രസ് നേതാവായിരുന്ന ഇദ്ദേഹം നേതൃത്വവുമായി ഇടഞ്ഞതിനെ തുടര്‍ന്ന് ജനകീയ വികസന മുന്നണി എന്ന സംഘടന രൂപീകരിക്കുകയും ജയിംസ് പന്തമാക്കലും സംഘവും കഴിഞ്ഞ പഞ്ചായത്ത് തെരഞ്ഞെടുപ്പില്‍ ഒറ്റയ്ക്ക് മത്സരിക്കുകയും ചെയ്തിരുന്നു. തെരെഞ്ഞെടുപ്പില്‍ വന്‍ ഭൂരിപക്ഷം നേടിയ ജയിംസിനു സി.പി.എമ്മിന്റെ സഹായവും ഉണ്ടണ്ടായിരുന്നു.