കൊച്ചി: മഹാരാജാസ് കോളജിലെ എസ്.എഫ്.ഐ നേതാവ് അഭിമന്യുവിനെ കുത്തിക്കൊലപ്പെടുത്തിയ കേസില്‍ തിരിച്ചറിഞ്ഞ പ്രതികളില്‍ ആറു പേര്‍ എറണാകുളം നെട്ടൂര്‍ സ്വദേശികളെന്ന് പൊലിസ്. കൊലപാതകം നടന്ന ശേഷം ഇവര്‍ ഒളിവില്‍ പോയിരിക്കുകയാണ്. ഇവര്‍ക്കായി പൊലിസ് തെരച്ചില്‍ ഊര്‍ജ്ജിതമാക്കിയിട്ടുണ്ട്. ഇവര്‍ എത്താനിടയുള്ള സ്ഥലങ്ങളില്‍ പൊലിസ് പരിശോധന നടത്തുന്നു.  കസ്റ്റഡിയിലുള്ള സൈഫുദ്ധീനില്‍ നിന്നാണ് ഇവരുടെ വിവരങ്ങള്‍ ലഭിച്ചത.്

കൊല നടത്തിയ ആളെ തിരിച്ചറിഞ്ഞതായി കഴിഞ്ഞ ദിവസം പൊലിസ് പറഞ്ഞിരുന്നു. ഇയാളുടെ പേരുവിവരങ്ങള്‍ അന്വേഷണ സംഘം പുറത്ത് വിട്ടിട്ടില്ല. എന്നാല്‍ എഫ്.ഐ.ആര്‍ ഇന്നലെ പുറത്തായി. പതിനഞ്ചംഗ സംഘമാണ് ആക്രമണം നടത്തിയതെന്ന് റിപ്പോര്‍ട്ട് വ്യക്തമാക്കുന്നു. ഇതില്‍ മുഹമ്മദ് ഒഴികെ 14 പേരും കാംപസിന് പുറത്തു നിന്നുള്ളവരാണ്. അതില്‍ കറുത്ത ഫുള്‍കൈ ഷര്‍ട്ടിട്ട പൊക്കം കുറഞ്ഞ കറുത്തയാളാണ് അഭിമന്യുവിനെ കുത്തിയതെന്നാണ് പൊലിസ് പറയുന്നത്. ആക്രമണത്തെ തുടര്‍ന്ന് എസ്.എഫ്.ഐ പ്രവര്‍ത്തകര്‍ ചിതറിയോടുന്നതിനിടെ അഭിമന്യുവിനെ പിന്നില്‍നിന്ന് കുത്തുകയായിരുന്നു.

 കേസില്‍ ഇന്നലെ രാവിലെ ആറു പേരെ കൂടി കസ്റ്റഡിയില്‍ എടുത്തിരുന്നു. ഇവര്‍ക്ക് കൃത്യത്തില്‍ നേരിട്ട് പങ്കുണ്ടെന്നാണ് വിവരം. ഇതുവരെ 130ഓളം എസ്.ഡി.പി.ഐപോപ്പുലര്‍ ഫ്രണ്ട് പ്രവര്‍ത്തകരെ കരുതല്‍ തടങ്കലിലാക്കിയിട്ടുണ്ട്. ഇവരെ വിവിധ കേന്ദ്രങ്ങളില്‍ ചോദ്യം ചെയ്യുന്നത് തുടരുകയാണ്. കേസില്‍ ഇതുവരെ നാലുപേര്‍ അറസ്റ്റിലായിട്ടുണ്ട്.