ഹൃദയം നാട്ടിലെ ബാങ്കില്‍
പണയം വച്ചതിനാലാവണം
ഇടക്കിടെ അവന്‍ പലിശ പുതുക്കാന്‍
നാട്ടിലേക്ക് പറക്കുന്നത്.

തിരിച്ച് പോക്ക്

ഭൂമി ഉരുണ്ടത് കൊണ്ടാണോ എന്തോ
എത്ര വട്ടം നാട്ടിലേക്ക് മടങ്ങിയാലും
വീണ്ടും തിരിച്ച്
ഈ മണലാരണ്യത്തിലെത്തും ഞാന്‍.

പ്രവാസിയുടെ മടക്കം

വിയര്‍പ്പ് തുള്ളികള്‍
പെര്‍ഫ്യൂം കുപ്പിയിലാക്കി,
വരണ്ട് കീറിയ കാല്‍പ്പാദങ്ങള്‍
സോക്‌സിലൊളിപ്പിച്ച്
വെയിലിനാല്‍ വാടിക്കരിഞ്ഞ ദേഹം
കോട്ടും സ്യൂട്ടും കൊണ്ട് പൊതിഞ്ഞ്
നീളന്‍ ടൈയാല്‍ വരിഞ്ഞ് കെട്ടി
വരുന്നുണ്ടവന്‍...
മുന്നിലൊന്നും ചെന്ന് പെട്ടേക്കല്ലേ.
മനസിലെ പൊടിക്കാറ്റ് അടങ്ങിയിട്ടുണ്ടാവില്ല...