ബിജ്‌നോര്‍: വയനാട്ടിലേക്കുള്ള കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ വരവിനെ പരിഹസിച്ച് ബി.ജെ.പി അധ്യക്ഷന്‍ അമിത് ഷാ. അമേത്തിയില്‍ കോണ്‍ഗ്രസും രാഹുലും നടത്തിയ പ്രവര്‍ത്തനങ്ങളില്‍ ജനങ്ങളുടെ അസംതൃപ്തി ഭയന്നാണ് അദ്ദേഹം വയനാട്ടിലും മത്സരിക്കുന്നതെന്ന് അമിത് ഷാ ആരോപിച്ചു. രാഹുല്‍ വയനാട്ടിലേക്ക് ഓടിയെന്ന വിവരം വാട്‌സ്ആപ്പിലൂടെയാണ് അറിഞ്ഞത്. എന്തുകൊണ്ടാണ് അദ്ദേഹം ഓടി രക്ഷപ്പെട്ടത്.? അമേത്തിക്കുവേണ്ടി രാഹുല്‍ ചെയ്ത കാര്യങ്ങള്‍ നമുക്ക് അറിയാവുന്നതാണ്. രാഷ്ട്രീയ ധ്രുവീകരണമുണ്ടാക്കി വിജയിക്കാനാണ് രാഹുല്‍ കേരളത്തിലേക്ക് പോയതെന്നും അമിത് ഷാ ആരോപിച്ചു. പടിഞ്ഞാറന്‍ ഉത്തര്‍പ്രദേശിലെ ബിജ്‌നോറില്‍ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അമിത് ഷാ.

2014ലെ പൊതുതെരഞ്ഞെടുപ്പില്‍ അമേത്തിയില്‍ രാഹുലിനോട് പരാജയപ്പെട്ട കേന്ദ്രമന്ത്രി സ്മൃതി ഇറാനിയും വയനാട്ടിലെ സ്ഥാനാര്‍ഥിത്വത്തെ വിമര്‍ശിച്ചു. അമേത്തിയിലെ ജനങ്ങള്‍ തള്ളിക്കളഞ്ഞതു കൊണ്ടാണ് രാഹുല്‍ മറ്റു മണ്ഡലങ്ങളില്‍ മത്സരിക്കാന്‍ ശ്രമിക്കുന്നതെന്ന് അവര്‍ ട്വിറ്ററില്‍ ആരോപിച്ചു.