തിരുവനന്തപുരം: സോഷ്യല്‍ മീഡിയയില്‍ കുട്ടികളുടെ നഗ്നചിത്രങ്ങള്‍ അപ്ലോഡ് ചെയ്യുന്നവരെ പിടിക്കാനായി സംസ്ഥാന വ്യാപകമായി നടത്തിയ പരിശോധനയില്‍ 12 പേര്‍ പിടിയില്‍. 16 പേര്‍ക്കെതിരെ കേസെടുത്തു. ഒപറേഷന്‍ 'പി ഹണ്ട'് എന്ന പേരിലാണ് പരിശോധന.

എസ്.പിമാരുടെ നേതൃത്വത്തില്‍ സംസ്ഥാനത്തെ മുഴുവന്‍ ജില്ലകളിലും പരിശോധന പുരോഗമിക്കുകയാണ്.

രാജ്യാന്തര കുറ്റാന്വേഷണ സംഘടനയായ ഇന്റര്‍പോള്‍ നല്‍കിയ വിവരങ്ങളുടെ അടിസ്ഥാനത്തിലാണ് കേരളാ പൊലീിസ് വ്യാപക പരിശോധന നടത്തിയത്. സ്ഥിരമായി ചിത്രങ്ങള്‍ അപ് ലോഡ് ചെയ്യുന്ന 84 വ്യക്തികളെയും വെബ്‌സൈറ്റുകളെയും കുറിച്ചുള്ള വിവരങ്ങളാണ് ഇന്റര്‍ പോള്‍ കൈമാറിയത്. 12 വസ്സില്‍ താഴെയുള്ള കുട്ടികളുടെ ചിത്രമാണ് ഇവര്‍ പങ്കുവച്ചത്. വാട്‌സ് ആപ്, ടെലിഗ്രാം അക്കൊണ്ടുകള്‍ വഴിയാണ് ഇവര്‍ ചിത്രങ്ങള്‍ കൈമാറിയിരുന്നത്. ഗ്രാമപ്രദേശങ്ങളിലെ കുട്ടികളാണ് ചൂഷണത്തിന് വിധേയമാകുന്നത്.

രാവിലെ സൈബര്‍ സെല്ലും സൈബര്‍ ഡോമും അടക്കമുള്ള അന്വേഷണ സംഘങ്ങളാണ് പ്രതികളുടെ വീടുകളിലും ഓഫിസുകളിലും പരിശോധന നടത്തിയത്. സംഭവുമായി ബന്ധപ്പെട്ട് 16 കേസുകള്‍ പൊലിസ് രജിസ്റ്റര്‍ ചെയ്തു. കംപ്യൂട്ടറുകളും മൊബൈല്‍ ഫോണുകളും പിടിച്ചെടുത്തിട്ടുണ്ട്. നഗ്നദൃശ്യങ്ങള്‍ പ്രദര്‍ശിപ്പിക്കുന്ന വെബ്‌സൈറ്റുകളിലും പൊലിസ് പരിശോധന നടത്തി.