തിരുവനന്തപുരം: കൊവിഡ് നിയന്ത്രണങ്ങള്‍ കാറ്റില്‍പറത്തി സമരം ചെയ്ത ബി.ജെ.പി, ബി.എം.എസ് പ്രവര്‍ത്തകര്‍ക്കെതിരേ കേസ്. രണ്ട് സമരങ്ങളിലായി 17 ബി.ജെ.പി പ്രവര്‍ത്തകര്‍ക്കെതിരേയും എട്ട് ബി.എം.എസ് പ്രവര്‍ത്തകര്‍ക്കെതിരേയുമാണ് കന്റോണ്‍മെന്റ് പൊലിസ് പകര്‍ച്ചവ്യാധി പ്രതിരോധ നിയമപ്രകാരം കേസെടുത്തത്.
സെക്രട്ടേറിയറ്റിന് മുന്‍പില്‍ ചൈന വിരുദ്ധ ധര്‍ണ നടത്തിയ ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍, ജില്ലാ പ്രസിഡന്റ് വി.വി രാജേഷ് ഉള്‍പ്പെടെ 17 പേര്‍ക്കെതിരേയാണ് കേസെടുത്തത്. ഇന്ധന വിലവര്‍ധനവിനെതിരേ ഓട്ടോറിക്ഷാ മസ്ദൂര്‍ സംഘം (ബി.എം.എസ്) ജില്ലാ കമ്മിറ്റിയുടെ ആഭിമുഖ്യത്തില്‍ പ്രതിഷേധിച്ചവര്‍ക്കെതിരേയും കേസെടുത്തു. സംസ്ഥാന പ്രസിഡന്റ് സി. ജ്യോതിഷ്‌കുമാര്‍, ജില്ലാ പ്രസിഡന്റ് ജയശങ്കര്‍, ജന. സെക്രട്ടറി വി. രാജേഷ്, മണികണ്ഠന്‍, ഹരികുമാര്‍, സുബാഷ് തുടങ്ങി കണ്ടാലറിയാവുന്ന എട്ട് ബി.എം.എസ് പ്രവര്‍ത്തകര്‍ക്കെതിരേയാണ് കേസെടുത്തത്.