ശ്രീനഗര്‍: ജമ്മു കശ്മിരിലെ അനന്ത്‌നാഗിലുണ്ടായ തീവ്രവാദി ആക്രമണത്തില്‍ സി.ആര്‍.പി.എഫ് ജവാന് വീരമൃത്യൂ. അനന്ത്‌നാഗ് ജില്ലയിലെ ബിജ്‌ബെഹറയില്‍ പദ്ശാഹിബാഗ് പ്രദേശത്ത് ഇന്നലെ രാവിലെയുണ്ടായ ആക്രമണത്തില്‍ സ്വദേശിയായ അഞ്ചു വയസുകാരനും കൊല്ലപ്പെട്ടതായി സൈന്യം വ്യക്തമാക്കി.

ഇവിടെ രാവിലെ സൈന്യം പട്രോളിങ് നടത്തുന്നതിനിടെ വെടിവയ്പുണ്ടാകുകയായിരുന്നെന്നാണ് വിവരം. വെടിവയ്പില്‍ പരുക്കേറ്റ ഇരുവരെയും ആശുപത്രിയിലെത്തിച്ചെങ്കിലും മരിക്കുകയായിരുന്നു. സംഭവത്തെ തുടര്‍ന്ന് പ്രദേശത്ത് കൂടുതല്‍ സൈന്യത്തെ വിന്യസിച്ച് തിരച്ചില്‍ നടത്തുന്നുണ്ട്.

പട്രോളിങ്ങിനിടെ സ്‌കൂട്ടറിലെത്തിയായിരുന്നു വെടിവയ്‌പെന്നാണ് വിവരം. ഷിമല്‍ കുമാര്‍ എന്ന ജവാനും നേഹന്‍ എന്ന കുട്ടിയുമാണ് മരിച്ചതെന്ന് സ്ഥിരീകരിച്ചിട്ടുണ്ട്.

 

മൂന്നു തീവ്രവാദികളെ വധിച്ചെന്ന് സൈന്യം

ശ്രീനഗര്‍: ജമ്മു കശ്മിരിലെ പുല്‍വാമയിലുണ്ടായ ഏറ്റുമുട്ടലില്‍ മൂന്നു തീവ്രവാദികളെ വധിച്ചതായി സൈന്യം. പുല്‍വാമയിലെ അവന്തിപോരയില്‍ ത്രാല്‍ പ്രദേശത്ത് കഴിഞ്ഞ ദിവസമായിരുന്നു ഏറ്റുമുട്ടല്‍ നടന്നത്. 

കഴിഞ്ഞ ദിവസം രാത്രി സൈന്യം പട്രോളിങ് നടത്തുന്നതിനിടെയാണ് ഇവിടെയും ഏറ്റുമുട്ടലുണ്ടായത്.