തളിപ്പറമ്പ്: പറശിനിക്കടവ് മുത്തപ്പന്‍ ക്ഷേത്രപരിസരത്ത് നിന്ന് പട്ടാപ്പകല്‍ ചാരിറ്റി ബോക്‌സ് മോഷ്ടിച്ചയാളെ പൊലിസ് അറസ്റ്റ് ചെയ്തു. തളിപ്പറമ്പ് തലോറയില്‍ താമസക്കുന്ന ഏര്യം തിമിരി സ്വദേശി വേങ്ങയില്‍ വീട്ടില്‍ വി.വി ദിവാകരനെയാണ്(44) തളിപ്പറമ്പ് പ്രിന്‍സിപ്പല്‍ എസ്.ഐ കെ. ദിനേശന്‍ അറസ്റ്റ് ചെയ്തത്. ക്ഷേത്രപരിസരത്തെ വ്യാപാരി സമൂഹം പാവപ്പെട്ട രോഗികളെ സഹായിക്കുന്നതിനായി സ്ഥാപിച്ച ചാരിറ്റി ബോക്‌സാണ് ഇന്നലെ ഉച്ചക്ക് പന്ത്രണ്ടോടെ ദിവാകരന്‍ മോഷ്ടിച്ച് ഓടിയത്. വ്യാപാരികള്‍ ഇയാളെ പിന്തുടര്‍ന്ന് പിടികൂടി പൊലിസിലേല്‍പ്പിക്കുകയായിരുന്നു. ചാരിറ്റി ബോക്‌സില്‍ പലരും സംഭാവനയായി നിക്ഷേപിച്ച ആറായിരത്തിലേറെ രൂപയുണ്ടായിരുന്നു. പ്രതിയെ ഇന്ന് കോടതിയില്‍ ഹാജരാക്കും.