പുത്തനത്താണി: മാറാക്കര വില്ലേജില്‍ 15 കുടുംബങ്ങള്‍ക്കു ഭൂമി പതിച്ചുനല്‍കാന്‍ സര്‍ക്കാര്‍ ഉത്തരവ്. പ്രൊഫ. കെ.കെ ആബിദ് ഹുസൈന്‍ തങ്ങള്‍ എം.എല്‍.എയുടെ ഇടപെടലിലൂടെയാണ് മാറാക്കര വില്ലേജിലെ റീ സര്‍വേ നമ്പര്‍ 3081 ലെ 3.27 ഏക്കര്‍ മിച്ചഭൂമി ഏറ്റെടുക്കുന്ന സമയത്തു കൈവശംവച്ചിരുന്ന 15 കുടുംബങ്ങള്‍ക്കു പതിച്ചുനല്‍കാന്‍ ഉത്തരവായത്.കേരളാ ഭൂപരിഷ്‌കരണ നിയമത്തിലെ 96, 1970ലെ കേരള ഭൂപരിഷ്‌കരണ (സീലിങ്) റൂള്‍ 29 എന്നിവ പ്രകാരം ഭൂമി പതിച്ചുനല്‍കുന്നതിനാണ് ഉത്തരവ്. 2011ല്‍ പ്രസ്തുത ഭൂമി അന്യ കൈവശത്തോടെ ഏറ്റെടുത്തിരുന്നു. ഈ ഭൂമിയില്‍ താമസിച്ചിരുന്നവര്‍ മറ്റു ഭൂമിയില്ലാത്ത കര്‍ഷക തൊഴിലാളികളായതിനാല്‍ കേരളാ ഭൂപരിഷ്‌കരണ നിയമത്തിലെ ഏഴ് ഇ വകുപ്പിന്റെ ആനുകൂല്യത്തിന് അര്‍ഹതയുള്ളവരായതിനാല്‍ ഭൂമി പതിച്ചുനല്‍കാന്‍ നടപടികള്‍ സ്വീകരിക്കുന്നതിനു ലാന്‍ഡ് ബോര്‍ഡ് സെക്രട്ടറിക്കു നിര്‍ദേശം നല്‍കിയിരുന്നു. കഴിഞ്ഞ വര്‍ഷം ജൂണില്‍ ഇവര്‍ സമര്‍പ്പിച്ച അപേക്ഷ പ്രകാരം കൈമാറ്റങ്ങള്‍ നടക്കാത്തതിനാല്‍ ലാന്‍ഡ് ട്രൈബ്യൂണല്‍ തുടര്‍ നടപടികള്‍ അവസാനിപ്പിച്ച് ഉത്തരവായി.
എന്നാല്‍, ഭൂമി പതിച്ചുനല്‍കാന്‍ സര്‍ക്കാര്‍ ഉത്തരവായിരുന്നില്ല. മാറാക്കര ഗ്രാമപഞ്ചായത്തംഗം സലീമും കക്ഷികളും എം.എല്‍.എയുമായി ബന്ധപ്പെട്ടതിന്റെ അടിസ്ഥാനത്തില്‍ വിശദമായ പരിശോധന നടത്തി പതിച്ചുനല്‍കുന്നതിനു ജില്ലാ കലക്ടര്‍ക്കു സര്‍ക്കാര്‍ നിര്‍ദേശം നല്‍കുകയായിരുന്നു.