കാസര്‍കോട്: തികഞ്ഞ ആത്മവിശ്വാസത്തോടെയാണ് ജനങ്ങളെ അഭിമുഖീകരിക്കുന്നതെന്ന് പത്രികാ സമര്‍പ്പണത്തിനുശേഷം രാജ്‌മോഹന്‍ ഉണ്ണിത്താന്‍ മാധ്യമങ്ങളോട് പറഞ്ഞു.
യു.ഡി.എഫ് വന്‍ ഭൂരിപക്ഷത്തോടെ വിജയിക്കും. 35 വര്‍ഷം വികസനം എന്തെന്നറിയാത്ത ശവപ്പറമ്പാണ് കാസര്‍കോട് പാര്‍ലമെന്റ് മണ്ഡലം . ജില്ലയില്‍ ഒരിടത്തുപോലും വ്യവസായം തുടങ്ങിയിട്ടില്ല. വ്യവസായം കൊണ്ടുവരാന്‍ സംസ്ഥാന സര്‍ക്കാറോ ഇടത് എം.പിമാരോ ശ്രമിച്ചിട്ടില്ല. കേരളത്തെ കൊലപാതക രാഷ്ട്രീയത്തിന്റെ കേളീരംഗമാക്കി മാറ്റിയിരിക്കുകയാണ് സി.പി.എം. പേറ്റുനോവ് അനുഭവിച്ച ഒരു സ്ത്രീയും ഇത്തവണ ഇടതു മുന്നണിക്ക് വോട്ടു ചെയ്യില്ല. രാഹുല്‍ ഗാന്ധി വയനാട്ടില്‍ മത്സരിക്കാന്‍ വരുന്നതോടെ പിണറായി വിജയന്റെയും കോടിയേരി ബാലകൃഷ്ണന്റെയും സമനില തെറ്റിയിരിക്കുകയാണ്. അതുകൊണ്ടാണ് ഇവര്‍ കോണ്‍ഗ്രസിനും മുസ്‌ലിം ലീഗിനുമെതിരേ പ്രസ്താവന നടത്തുന്നതെന്നും ഉണ്ണിത്താന്‍ പറഞ്ഞു.