ചെറുപുഴ: അരവഞ്ചാല്‍ ചള്ളച്ചാലില്‍ സര്‍ക്കാര്‍ ഭൂമിയിലെ മരങ്ങള്‍ സൈനികന്റെ വീടിന് മുകളിലേക്ക് കടപുഴകി വീണ് സണ്‍ഷെയ്ഡ് തകര്‍ന്നു. ചള്ളച്ചാലിലെ രാജി പാലമൂട്ടിലിന്റെ വീടിന് മുകളിലേക്കാണ് കഴിഞ്ഞ ദിവസം രാത്രി മരങ്ങള്‍ വീണത്. ജമ്മുവില്‍ സേവനമനുഷ്ടിക്കുന്ന രാജിയുടെ ഭാര്യയും രണ്ടു മക്കളുമാണ് ഇവിടെ താമസം. സംഭവസമയം ഇവര്‍ അടുത്തുള്ള ബന്ധുവീട്ടില്‍ പോയതിനാല്‍ അപകടം ഒഴിവായി. വലിയ രണ്ട് കാട്ടുകടുക്ക മരങ്ങളാണ് വീടിന് മുകളിലേക്ക് പതിച്ചത്. മരം അപകട ഭീഷണി ഉയര്‍ത്തുന്നതായി പലതവണ അധികൃതരെ അറിയിച്ചിട്ടും യാതൊരു മറുപടിയും ഇതുവരെ ഉണ്ടാവാഞ്ഞതാണ് അപകടത്തിന് കാരണമെന്ന് രാജിയുടെ ബന്ധു പറഞ്ഞു.