ലക്‌നൗ: യു.പിയില്‍ കുപ്രസിദ്ധ കുറ്റവാളിയെ പിടികൂടാനെത്തിയ പൊലിസുകാരെ അക്രമികള്‍ വെടിവച്ചു കൊലപ്പെടുത്തി. ഡി.വൈ.എസ്.പി ദേവേന്ദ്ര മിശ്രയടക്കം എട്ടു പൊലിസുകാരാണ് കൊല്ലപ്പെട്ടത്. കാണ്‍പൂരിലെ ബിക്രു ഗ്രമത്തിലാണ് സംഭവം.
12ഓളം പൊലിസുകാര്‍ക്ക് പരുക്കേറ്റു. പൊലിസ് തിരിച്ചടിയില്‍ രണ്ടു അക്രമികളും കൊല്ലപ്പെട്ടതായി റിപ്പോര്‍ട്ടുണ്ട്.
60 ഓളം കേസുകളില്‍ പ്രതിയായ വികാസ് ദുബെയെ തേടിയെത്തിയ പൊലിസ് സംഘത്തിന് നേരെയാണ് വെടിവയ്പ്പുണ്ടായത്. രാഷ്ട്രീയ സ്വാധീനമുള്ള പ്രതിയെ പിടികൂടാനായി മൂന്ന് പൊലിസ് സ്റ്റേഷനുകളില്‍ നിന്നുള്ള 50 ഓളം പൊലിസുകാരാണ് എത്തിയിരുന്നത്. എന്നാല്‍ പൊലിസുകാര്‍ വാഹനത്തില്‍ നിന്നിറങ്ങിയ ഉടന്‍ ഒളിഞ്ഞിരിക്കുകയായിരുന്ന അക്രമികള്‍ മൂന്നുഭാഗത്തുനിന്നും വെടിയുതിര്‍ക്കുകയായിരുന്നു എന്ന് പൊലിസ് മേധാവി അറിയിച്ചു.
കഴിഞ്ഞ ദിവസം രാത്രിയായിരുന്നു സംഭവം. ആക്രമണം മുന്‍കൂട്ടി ആസൂത്രണം ചെയ്തതായിരുന്നു എന്ന് പൊലിസ് അഭിപ്രായപ്പെട്ടു. സംഭവത്തില്‍ അഡീഷനല്‍ ചീഫ് സെക്രട്ടറിയോടും ഡി.ജി.പിയോടും മുഖ്യമന്ത്രി യോഗി ആദിത്യനാഥ് റിപ്പോര്‍ട്ട് തേടി.
അക്രമികള്‍ രക്ഷപ്പെടുന്നത് തടയാന്‍ പൊലിസ് കാണ്‍പൂര്‍ അതിര്‍ത്തി അടച്ചു.