കാട്ടൂര്‍: വാടകവീടെടുത്ത് താമസിച്ച് യുവാക്കള്‍ക്ക് കഞ്ചാവ് വില്‍പ്പന നടത്തുന്നതിനിടെ ചെന്ത്രാപ്പിന്നി സ്വദേശിയെ തൃശൂര്‍ എക്‌സൈസ് എന്‍ഫോഴ്‌സ്‌മെന്റ് ആന്റ് ആന്റി നാര്‍കോട്ടിക് സ്‌പെഷ്യല്‍ സ്‌ക്വാഡ് എക്‌സൈസ് ഇന്‍സ്‌പെക്ടര്‍ ഷാജി അറസ്റ്റ് ചെയ്തു.
ചെന്ത്രാപ്പിന്നി പുതിയ വീട്ടില്‍ ഷക്കീറലി എന്ന ഉണ്ണിമോന്‍ (27) ആണ് പിടിയിലായത്. നൂറു ഗ്രാം കഞ്ചാവ് ഇയാളില്‍ നിന്നും പിടികൂടിയിട്ടുണ്ട്. ചെറുപോളിത്തീന്‍ കവറുകളില്‍ സൂക്ഷിക്കുന്ന കഞ്ചാവ് ആവശ്യക്കാര്‍ക്ക് ഫോണ്‍ സന്ദേശങ്ങള്‍ അനുസരിച്ച് കൊടുക്കുകയാണ് പതിവ്. ധാരാളം യുവാക്കള്‍ ഇയാളെ തേടി രാത്രി സമയങ്ങളില്‍ വരുന്നതു കണ്ട് സംശയം തോന്നിയ നാട്ടുകാര്‍ നല്‍കിയ പരാതിയെ തുടര്‍ന്നാണ് എക്‌സൈസ് ഷാഡോ ടീം നടത്തിയ നീരിക്ഷണത്തിന്റെ അടിസ്ഥാനത്തില്‍ ഉണ്ണിമോന്‍ പിടിയിലാകുന്നത്.
പ്രിവന്റീവ് ഓഫിസര്‍മാരായ വി.എ ഉമ്മര്‍, എം.ജി അനൂപ്, സിവില്‍ എക്‌സൈസ് ഓഫിസര്‍മാരായ റെനില്‍, ഗിരിധരന്‍, ഷാഡോ ടീം അംഗങ്ങളായ അബ്ദുല്‍ ജബാര്‍, ബിബിന്‍ ഭാസ്‌കര്‍ എന്നിവരും അന്വേഷണ സംഘത്തില്‍ ഉണ്ടായിരുന്നു.