അന്തിക്കാട്: തകര്‍ന്ന ഓലക്കുടിലില്‍ കാന്‍സര്‍ ബാധിതയായ മാലതിയുടെ ജീവിതം ഒരു ഗ്രാമത്തിനു മുഴുവന്‍ നൊമ്പര കാഴ്ചയാകുന്നു. കാരമുക്ക് എസ്.എന്‍.ജി.എസ് ഹയര്‍ സെക്കന്‍ഡറി സ്‌കൂളിനു സമീപം പാണനാര്‍ കുടുംബത്തിലെ പരേതരായ വാസുവിന്റെയും കൊച്ചമ്മിണിയുടെയും മകള്‍ മാലതി (50)ക്കാണ് ഈ ദുരവസ്ഥ.
കുടില്‍ രഹിത പഞ്ചായത്തെന്നറിയപ്പെടുന്ന മണലൂര്‍ പഞ്ചായത്തിലെ 18-ാം വാര്‍ഡിലാണ് മാലതിയുടെ ദുരിതപൂര്‍ണമായ ജീവിതം. അന്തിയുറങ്ങാനുണ്ടായിരുന്ന ഈ കൊച്ചു ഓലകുടില്‍ കഴിഞ്ഞ പ്രളയത്തില്‍ തെങ്ങ് വീണും ചിതലരിച്ചും നശിച്ച നിലയിലാണ്. കുടിലിനകത്ത് ഇഴജന്തുക്കളുടെ ശല്യവും രൂക്ഷമാണ്. സ്വന്തം പേരില്‍ ഒരു തുണ്ട് ഭൂമി പോലും ഇല്ലാത്തതിനാല്‍ സര്‍ക്കാരില്‍ നിന്നും വീടുവയ്ക്കാനുള്ള ധനസഹായമൊന്നും കിട്ടിയില്ല. നാട്ടുകാരുടെ സഹായത്താലാണ് ഓല മേഞ്ഞ ഈ കുടില്‍ നിര്‍മിച്ചത്. അതാണ് തെങ്ങു വീണതിനെ തുടര്‍ന്ന് തകര്‍ന്നത്. ജീവിതം തള്ളിനീക്കാന്‍ പ്രയാസപ്പെടുന്ന മാലതിയുടെ അവസ്ഥ മനസിലാക്കി ആരെങ്കിലും വല്ലതും നല്‍കിയാല്‍ അത് മരുന്നിനു പോലും തികയില്ല.
ഒരു കുടുംബക്ഷേത്രഭൂമിയില്‍ വര്‍ഷങ്ങളായി മൂന്ന് സെന്റില്‍ താമസിച്ചു വരികയാണ് മാലതി. ഈ മൂന്ന് സെന്റ് ഭൂമി സ്വന്തം പേരിലല്ലാത്തതിനാല്‍ വീട് വയ്ക്കാനുള്ള ആനുകൂല്യം നിഷേധിക്കപ്പെടുന്നു. ഭൂമിക്ക് പട്ടയം ലഭിക്കുന്നതിനായി മാലതി മുട്ടാത്ത വാതിലുകളില്ല. മാതാപിതാക്കളും ചേച്ചിയും അസുഖം ബാധിച്ചു മരിച്ചതോടെ മസ്തിഷ്‌ക കാന്‍സര്‍ ബാധിതയായ മാലതി ഒറ്റയ്ക്കാണ് ഈ തകര്‍ന്നടിഞ്ഞ കുടിലില്‍ താമസിക്കുന്നത്.