മൂന്നു വീടുകള്‍ മണ്ണിനടിയില്‍ 

സ്വന്തം ലേഖകന്‍ 

മംഗളൂരു: വീടിന് മുകളില്‍ മണ്ണിടിഞ്ഞ് വീണ് ഒരു കുടുംബത്തിലെ രണ്ടു കുട്ടികള്‍ മരിച്ചു. മംഗളൂരു വിമാനത്താവളത്തിനടുത്ത ഗുരുപുര ഗ്രാമത്തിലെ ബംഗ്ലഗുഡെയില്‍ ഇന്നലെ ഉച്ചയ്ക്ക് മൂന്നോടെയാണ് അപകടം. സഫ്‌വാന്‍ (16), സഹല (10) എന്നിവരാണ് മരിച്ചത്. 

മൂന്നു വീടുകള്‍ പൂര്‍ണമായും  മണ്ണിനടിയിലായിട്ടുണ്ട്. ഇതിനുപുറമെ സമീപത്തെ നിരവധി വീടുകള്‍ അപകടാവസ്ഥയിലാണ്. അപകടത്തെ തുടര്‍ന്ന് 14 വീടുകളിലെ ആളുകളെ സുരക്ഷിത സ്ഥലത്തേക്ക് മാറ്റിയിട്ടുണ്ട്. കഴിഞ്ഞ രണ്ടുദിവസമായി പ്രദേശത്ത് കനത്ത മഴയാണ്. അപകട വിവരമറിഞ്ഞ് മന്ത്രി കോട്ട ശ്രീനിവാസ് പൂജാരി സ്ഥലം സന്ദര്‍ശിച്ചു. വീട് നഷ്ടമായവര്‍ക്ക് സര്‍ക്കാര്‍ പുതിയ വീടുകള്‍ നിര്‍മിച്ചുനല്‍കുമെന്ന് മന്ത്രി കുടുംബങ്ങള്‍ക്ക് ഉറപ്പുനല്‍കിയിട്ടുണ്ട്.