വൈപ്പിന്‍: ഞാറക്കല്‍ പഞ്ചായത്തിന്റെ വിവിധ ഭാഗങ്ങളില്‍ കുടിവെള്ള ക്ഷാമം രൂക്ഷമാകുന്നു. വേനല്‍ കടുത്തതോടെ കുടിനീര്‍ ലഭിക്കാതെ മഞ്ഞനക്കാട്, കിഴക്കേ അപ്പങ്ങാട്, പെരുമ്പിള്ളികിഴക്കും പടിഞ്ഞാറും ഭാഗങ്ങളില്‍ ഉള്‍പ്പെടെ ജനങ്ങള്‍ നെട്ടോട്ടമോടുകയാണ്. പലരും കുടിക്കാനുള്ള വെള്ളം എത്തിക്കുന്നത് സമീപപ്രദേശങ്ങളിലുള്ള ബന്ധുവീടുകളില്‍ നിന്നും മറ്റുമാണ്.  അതേസമയം എടവനക്കാട് തീര മേഖലയില്‍ കുടിവെള്ളം കുറഞ്ഞതോതില്‍ മാത്രം ലഭിക്കുന്നുള്ളൂവെന്ന് പരാതിയുണ്ട്. എടവനക്കാട് ചാത്തങ്ങാട് കിഴക്ക് പൊതുടാപ്പ് പൊട്ടി ലിറ്റര്‍കണക്കിന് വെള്ളമാണ് നഷ്ടപ്പെടുന്നത്.
ആഴ്ചകളായി ഇത്തരത്തില്‍ വെള്ളം നഷ്ടപ്പെട്ടിട്ടും ബന്ധപ്പെട്ടവര്‍ യാതൊരുടപടിയും സ്വീകരിക്കുന്നില്ലന്ന് നാട്ടുകാര്‍ പരാതിപ്പെടുന്നു.