വാഷിങ്ടണ്‍: കൊവിഡിനെ തുടര്‍ന്ന് പഠനം പൂര്‍ണമായും ഓണ്‍ലൈനിലായ വിദേശ വിദ്യാര്‍ഥികളെ രാജ്യത്ത് തുടരാന്‍ അനുവദിക്കില്ലെന്ന് യു.എസ്. അതേസമയം കുടിയേറ്റക്കാരല്ലാത്ത എഫ്-1, എം-1 വിദ്യാര്‍ഥികള്‍ക്ക് യു.എസില്‍ തുടരാം. ഇവര്‍ പൂര്‍ണമായും ഓണ്‍ലൈന്‍ പഠനത്തിലല്ലാത്തതിനാലാണിതെന്ന് യു.എസ് ഇമിഗ്രേഷന്‍ ആന്‍ഡ് കസ്റ്റം എന്‍ഫോഴ്‌സ്‌മെന്റ് വിഭാഗം അറിയിച്ചു. അതേസമയം ഓണ്‍ലൈന്‍ പഠനത്തിലേക്കു മാറിയ വിദ്യാര്‍ഥികള്‍ രാജ്യം വിട്ടില്ലെങ്കില്‍ കനത്ത നടപടികള്‍ നേരിടേണ്ടിവരും.
ക്ലാസുകള്‍ ഓണ്‍ലൈനിലേക്ക് മാറിയ വിദ്യാഭ്യാസ സ്ഥാപനങ്ങളിലെ ആഗസ്റ്റില്‍ തുടങ്ങാനിരിക്കുന്ന സെമസ്റ്ററിനുള്ള വിദ്യാര്‍ഥികളുടെ വിസ അനുവദിക്കില്ലെന്നും ഐ.സി.ഇ പ്രസ്താവനയില്‍ പറയുന്നു. ആഗസ്റ്റില്‍ തുടങ്ങുന്ന സെമസ്റ്ററിലെ ക്ലാസുകള്‍ സംബന്ധിച്ച് യു.എസിലെ മിക്ക കോളജുകളും യൂണിവേഴ്‌സിറ്റികളും ഇതുവരെ പദ്ധതികളൊന്നും പ്രഖ്യാപിച്ചിട്ടില്ല. അതേസമയം ഹാര്‍വാര്‍ഡ് യൂണിവേഴ്‌സിറ്റി ക്ലാസുകള്‍ ഓണ്‍ലൈനിലായിരിക്കും എന്ന് അറിയിച്ചിട്ടുണ്ട്. ബിരുദ പഠനക്കാരില്‍ 40 ശതമാനം പേര്‍ക്ക് കാംപസില്‍ പ്രവേശിക്കാന്‍ അനുമതി നല്‍കിയിട്ടുണ്ട്. എന്നാല്‍ ഇവരുടെ ക്ലാസുകള്‍ ഓണ്‍ലൈനായിരിക്കും.
2018-19 അക്കാദമിക വര്‍ഷത്തെ കണക്കുകള്‍ പ്രകാരം 10 ലക്ഷത്തോളം വിദേശ വിദ്യാര്‍ഥികളാണ് നിലവില്‍ യു.എസില്‍ ഉന്നത പഠനം നടത്തുന്നത്. രാജ്യത്തെ ഉന്നത വിദ്യാഭ്യാസം നേടുന്നവരുടെ 5.5 ശതമാനം വരുമിത്. 2018ല്‍ 4,470 കോടി ഡോളറാണ് ഇവര്‍ വഴി യു.എസിന് ലഭിച്ചത്. ഇതില്‍ ചൈന കഴിഞ്ഞാല്‍ ഏറ്റവും കൂടുതല്‍ വിദ്യാര്‍ഥികള്‍ ഇന്ത്യയില്‍ നിന്നാണ്. ദ. കൊറിയ, സഊദി, കാനഡ എന്നീ രാജ്യങ്ങളിലെ വിദ്യാര്‍ഥികളാണ് മറ്റുള്ളവര്‍.