കുന്നംകുളം: പെരുമ്പിലാവില്‍ മൂന്ന് കടകള്‍ കുത്തിത്തുറന്ന് മോഷണം. അന്‍സാര്‍ സ്‌കൂളിന് മുന്‍വശത്തുള്ള ചുണ്ടാലത്ത് പ്രേംരാജിന്റെ ചുണ്ടാലത്ത് റസ്റ്റോറന്റ്, മേലേതില്‍ വീട്ടില്‍ ശ്രീനിവാസന്റെ ശ്രിനി ബേക്കറി, കുളങ്ങര കൊങ്ങത്ത് മല്ലികയുടെ ഉടമസ്ഥതയിലുള്ള ശ്രുതി ടൈലറിങ്ങ് ഷോപ്പ് എന്നിവിടങ്ങളിലാണ് മോഷണം നടന്നത്.
ഇന്നലെ രാത്രി 12.30 നായിരുന്നു സംഭവം. ഷട്ടര്‍ തുറക്കുന്ന ശബ്ദം സമീപത്തെ താമസക്കാരിയായ സ്ത്രീ കേട്ടിരുന്നു. വിലപിടിപ്പുള്ള സാധനങ്ങളൊന്നും നഷ്ടപ്പെട്ടിട്ടില്ല. ചുണ്ടാലത്ത് റസ്റ്റോറന്റിന്റെ മുന്‍പിലെ പൂട്ട് പൊളിച്ച് അകത്ത് കടന്ന കള്ളന്‍ കാഷ് ബോക്‌സിനുള്ളിലെ പേഴ്‌സുകളാണ് മോഷ്ടിച്ചത്.
ഇത് സമീപത്തെ പറമ്പില്‍ നിന്നും നാട്ടുകാര്‍ കണ്ടെടുത്തു. ശ്രീനി ബേക്കറിയില്‍ നിന്നും ക്യഷ് ബോക്‌സാണ് മോഷണം പോയത്. ഇതിലുണ്ടായിരുന്ന അഞ്ഞൂറ് രൂപ നഷ്ടപ്പെട്ടതായി കടയുടമ പറഞ്ഞു. ശ്രുതി ടൈലറിങ്ങ് ഷോപ്പിലെ ക്യാഷ് ബോക്‌സ് മോഷ്ടിച്ച മോഷ്ടാവ് ഇവിടെയുള്ള വസ്ത്രങ്ങള്‍ മുഴുവന്‍ വാരിവലിച്ചിട്ടു. സമീപകാലത്തായി പ്രദേശങ്ങളില്‍ മോഷ്ടാക്കളുടെ ശല്യം വര്‍ധിച്ചതായി നാട്ടുകാര്‍ പറഞ്ഞു. അടുത്തിടെയാണ് അന്‍സാര്‍ ആശുപത്രി ഭക്ഷണശാലയില്‍ മോഷണം നടന്നത്.