സ്‌കോട്ട്‌ലന്‍ഡ്: യൂറോപ്യന്‍ യൂനിയനില്‍നിന്നു പിന്‍മാറാനുള്ള ബ്രിട്ടനിലെ ജനഹിത പരിശോധനാ ഫലത്തിനു പിന്നാലെ വിഷയത്തില്‍ ബ്രിട്ടന്‍-സ്‌കോട്ടിഷ് നേതാക്കള്‍ ചര്‍ച്ച തുടങ്ങി.
വിഷയം ചര്‍ച്ച ചെയ്യുന്നതിനായി ബ്രിട്ടന്റെ പുതിയ പ്രധാനമന്ത്രിയായി കഴിഞ്ഞ ദിവസം തെരഞ്ഞെടുക്കപ്പെട്ട തേരേസ മേ സ്‌കോട്ട്‌ലന്‍ഡിലെത്തി. സ്‌കോട്ട്‌ലന്‍ഡ് പ്രഥമ മന്ത്രി നികോള സ്റ്റര്‍ജിയോണുമായി അവര്‍ കൂടിക്കാഴ്ച നടത്തും.
യൂറോപ്യന്‍ യൂനിയന്‍ വിടാനുള്ള തീരുമാനം ബുദ്ധിമുട്ടാകുമെന്ന് അഭിപ്രായപ്പെട്ട നികോള സ്റ്റെര്‍ജിയോണ്‍, വിഷയത്തില്‍ സ്‌കോട്ട്‌ലന്‍ഡിന്റെ താല്‍പര്യം ബ്രിട്ടന്‍ മാനിക്കുമെന്നാണ് പ്രതീക്ഷയെന്നും കൂട്ടിച്ചേര്‍ത്തു.
വിഷയത്തില്‍ എല്ലാവര്‍ക്കും സ്വീകാര്യമായ തീരുമാനമുണ്ടാകുമെന്നു ബ്രിട്ടന്‍ പ്രധാനമന്ത്രി തെരേസ മേയും പറഞ്ഞു.
ബ്രെക്‌സിറ്റ് വിഷയത്തില്‍ സ്‌കോട്ട്‌ലന്‍ഡ് സര്‍ക്കാരുമായി ആശയവിനിമയം നടത്തുകയെന്നതിനു പുറമേ, സ്‌കോട്ട്‌ലന്‍ഡിലെ ജനങ്ങളുമായി സംവദിക്കുകയെന്നതും തന്റെ ലക്ഷ്യമാണെന്ന് അവര്‍ പറഞ്ഞു.
പ്രധാനമന്ത്രിയായി തെരഞ്ഞെടുക്കപ്പെട്ടതിനു ശേഷം തെരേസ മേ നടത്തുന്ന ആദ്യ ഔദ്യോഗിക സന്ദര്‍ശനമാണിത്.