മനില: വിവാദ ഫിലിപ്പീന്‍സ് പ്രസിഡന്റ് റോഡ്രിഗോ ഡ്യുട്ടെര്‍ട്ട് പുതിയ വാദവുമായി രംഗത്ത്. തനിക്ക് തീവ്രവാദികളേക്കാള്‍ 50 മടങ്ങ് ക്രൂരനാവാനാവുമെന്നാണ് ഇപ്പോള്‍ പറഞ്ഞിരിക്കുന്നത്.

തീവ്രവാദികള്‍ മൃഗങ്ങളാണെന്നും അവരെ ജീവിക്കാന്‍ അനുവദിക്കേണ്ടെന്നും കൊന്നുകളയണമെന്നുമാണ് ഡ്യുട്ടെര്‍ട്ട് ഉത്തരവിട്ടിരിക്കുന്നത്. 'ഞാനൊരു മൃഗമാവണമെങ്കില്‍ അങ്ങനെ ചെയ്യാം, അവര്‍ക്കെതിരെ അമ്പതിരട്ടി തിരിച്ചടി നല്‍കുക'- ഡ്യുട്ടെര്‍ട്ട് പറഞ്ഞു.

'എനിക്ക് ഉപ്പും വിനാഗിരിയും തരൂ, ഞാനതും കൂട്ടി അവരുടെ കരള്‍ തിന്നോളാം'- ദേഷ്യത്തോടെ ഡ്യുട്ടെര്‍ട്ട് പറഞ്ഞു.

ലഹരി ഉപയോഗിക്കുന്നവരെ കൂട്ടത്തോടെ ജയിലിലടക്കുകയും ഇവര്‍ക്ക് കൂട്ട വധശിക്ഷ നല്‍കാന്‍ തീരുമാനിച്ചതും വലിയ വിവാദമായിരുന്നു.

ദീര്‍ഘകാലം സിറ്റി മേയറായിരുന്ന ഡ്യുട്ടെര്‍ട്ട് കഴിഞ്ഞവര്‍ഷം മേയിലാണ് പ്രസിഡന്റ് പദവിയിലെത്തിയത്. തീവ്രവാദം, അഴിമതി, അനധികൃത ലഹരി എന്നിവ തുടച്ചുനീക്കുമെന്ന പ്രഖ്യാപനത്തോടെയാണ് അധികാരത്തിലേറിയത്. ലഹരി വിരുദ്ധ നടപടിയുടെ പേരില്‍ ആയിരങ്ങളെ ഡ്യുട്ടെര്‍ട്ട് ഭരണകൂടം കൊന്നൊടുക്കി. ഇതിനെതിരെ മനുഷ്യാവകാശ സംഘടകളും പാശ്ചാത്യന്‍ ശക്തികളും രംഗത്തെത്തിയിരുന്നു.

ദക്ഷിണ ഫിലിപ്പീന്‍സിലെ വിമത വിഭാഗമായ മുസ്‌ലിംകളെയാണ് ഡ്യുട്ടെര്‍ട്ട് സര്‍ക്കാര്‍ തീവ്രവാദികളായി കാണുന്നത്. ഇവരെ വകവരുത്തുമെന്നാണ് ഡ്യുട്ടെര്‍ട്ടിന്റെ ഭീഷണി.

ബോഹോളില്‍ നടന്ന ആക്രമണത്തിന് ഉത്തരവാദികളായ അബു സയ്യാഫിനെയും കൂട്ടാളികളെയും കുറിച്ച് വിവരം നല്‍കുന്നവര്‍ക്ക് പാരിതോഷികം നല്‍കുമെന്ന് അദ്ദേഹം പ്രഖ്യാപിച്ചിരുന്നു. ഈ ആക്രമണത്തില്‍ എട്ട് തീവ്രവാദികളും മൂന്ന് സൈനികരും ഒരു പൊലിസും രണ്ട് ഗ്രാമവാസികളും കൊല്ലപ്പെട്ടിരുന്നു.