കോഴിക്കോട്: കേരള ജനതയെ ദുരിതത്തിലേക്ക് തള്ളിയിട്ട ഇടതു സര്‍ക്കാരിന്റെ കപട നയങ്ങള്‍ക്കെതിരേ ഓഗസ്റ്റ് 31ന് മുഴുവന്‍ നിയമസഭ മണ്ഡലങ്ങളിലും ജനമുന്നേറ്റ റാലി സംഘടിപ്പിക്കാന്‍ മുസ്‌ലിം ലീഗ് സംസ്ഥാന നേതൃയോഗം തീരുമാനിച്ചു.രണ്ടു വര്‍ഷം പൂര്‍ത്തിയാക്കിയ എല്‍.ഡി.എഫ് സര്‍ക്കാരിന്റേതായി എടുത്തു പറയാവുന്ന ഒരു നേട്ടം പോലുമില്ല. രൂക്ഷമായ വിലക്കയറ്റവും ക്രമസമാധാന തകര്‍ച്ചയും കാരണം സംസ്ഥാനത്തെ ജനങ്ങളുടെ ജീവിതം ദുസ്സഹമായിരിക്കുന്നു.
ഓരോ ദിവസവും കൂടുതല്‍ വീഴ്ചകള്‍ ആവര്‍ത്തിക്കുകയും തീവ്ര പ്രസ്ഥാനങ്ങളുടെ പറുദീസയായി കേരളം മാറാനുള്ള സാഹചര്യം സൃഷ്ടിക്കുകയുമാണ്. ഇതിനെതിരേ സെപ്റ്റംബര്‍ അവസാനവാരം നാലു മേഖലകളില്‍ ജനമുന്നേറ്റ സംഗമങ്ങളും സംഘടിപ്പിക്കും.
മലപ്പുറം, പാലക്കാട്, തൃശൂര്‍ ജില്ലകളുള്‍പ്പെട്ട മേഖലാ സംഗമം സെപ്റ്റംബര്‍ 22ന് കുറ്റിപ്പുറത്ത് നടക്കും. പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. കാസര്‍കോട്, കണ്ണൂര്‍, വയനാട്, കോഴിക്കോട് ജില്ലകളുടെ സംഗമം കണ്ണൂരും, എറണാകുളം, ഇടുക്കി, കോട്ടയം, ആലപ്പുഴ ജില്ലയുടെ സംഗമം എറണാകുളത്തും, പത്തനംതിട്ട, കൊല്ലം, തിരുവനന്തപുരം ജില്ലകളുടെ സംഗമം കൊല്ലത്തും നടക്കും.