ഇറ്റാനഗര്‍: അരുണാചലില്‍ ആറു വിഘടനവാദികളെ പൊലിസ് വധിച്ചു. കോന്‍സയില്‍ ഇന്നലെ രാവിലെ നടന്ന ഏറ്റുമുട്ടലിലാണ് ആറു നാഗാ തീവ്രവാദികളെ വധിച്ചതെന്ന് പൊലിസ് അറിയിച്ചു. സംഭവത്തില്‍ അസം റൈഫിള്‍സിലെ ഒരു സൈനികന് പരുക്കേല്‍ക്കുകയും ചെയ്തിട്ടുണ്ട്.

കൊല്ലപ്പെട്ടവരില്‍നിന്ന് എ.കെ 47 തോക്കടക്കമുള്ള ആയുധങ്ങളും മറ്റും കണ്ടെടുത്തതായും പൊലിസ് വ്യക്തമാക്കി. അരുണാചല്‍ പദേശ് പൊലിസും അസം റൈഫിള്‍സും സംയുക്തമായാണ് തിരച്ചില്‍ നടത്തിയത്. പുലര്‍ച്ചെ നാലരയോടെയാണ് ഏറ്റുമുട്ടല്‍ ആരംഭിച്ചതെന്നും പരുക്കേറ്റ സൈനികന്റെ നില ഗുരുതരമല്ലെന്നും പൊലിസ് വ്യക്തമാക്കി.