ഒറ്റത്തറ: പാട്ടുപാറകുളമ്പ എ.എം.എല്‍.പി സ്‌കൂളിന് അത്യാധുനിക സൗകര്യങ്ങളോടെ പുതിയ കെട്ടിടം നിര്‍മിക്കുന്നു. എല്ലാവിധ ആധുനിക സൗകര്യങ്ങളോടുകൂടിയ പുതിയ കെട്ടിടത്തിലെ മുഴുവന്‍ ക്ലാസ് മുറികളും സമാര്‍ട്ടാകും. വിപുലമായ കംപ്യൂട്ടര്‍ ലാബുമൊരുക്കും.
പുതിയ കെട്ടിടം വരുന്നതൊടൊപ്പം വിശാലമായ കളിസ്ഥലം, കിഡ്‌സ് പാര്‍ക്ക്, ജൈവവൈവിധ്യ ഔഷധോദ്യാനം തുടങ്ങി സ്‌കൂളിനെ ശരിക്കും മികവിന്റെ കേന്ദ്രമാക്കാനുള്ള എല്ലാസൗകര്യങ്ങളുമൊരുക്കും. ഗുണനിലവാരമുള്ള വിദ്യാഭ്യാസം എല്ലാവര്‍ക്കും ലഭ്യമാക്കുക എന്നലക്ഷ്യത്തോടെ വാര്‍ഡ് വികസന സമിതിയും അധ്യാപക രക്ഷകര്‍തൃ സമിതിയും മാനേജ്‌മെന്റും സഹകരിച്ചാണ് കഴിഞ്ഞവര്‍ഷം 'എക്‌സലന്റ് സ്‌കൂള്‍' പദ്ധതി തുടങ്ങിയത്. വിദ്യാഭ്യാസ വകുപ്പ് നിര്‍ദ്ദേശിക്കുന്ന പരിപാടികളും വിവിധദിനാചരണങ്ങളും കൂടാതെ വിദ്യാര്‍ഥികളില്‍ കാര്‍ഷിക താല്‍പര്യം ജനിപ്പിക്കുന്നതിന് വേണ്ടിയുള്ള ജൈവ പച്ചക്കറി കൃഷി പദ്ധതി, നീന്തല്‍ പരിശീലനം, പ്രത്യേക വര്‍ക്ക് ബുക്ക് തയാറാക്കി ഒഴിവ് സമയങ്ങളില്‍ ഇംഗ്ലീഷില്‍ പ്രത്യേക പരിശീലനം, മെഡിക്കല്‍ ക്യാംപുകള്‍, പ്രഭാതഭക്ഷണം തുടങ്ങിയ ഒട്ടേറെ നൂതനപരിപാടികളാണ് 'എക്‌സലന്റ് സ്‌കൂള്‍' പദ്ധതി പ്രകാരം നടപ്പിലാക്കി കൊണ്ടിരിക്കുന്നത്.