കോഴിക്കോട്: ദേശീയ സബ് ജൂനിയര്‍ ഫുട്‌ബോള്‍ ചാംപ്യന്‍ഷിപ്പില്‍ നിലവിലെ ചാംപ്യന്‍മാരായ ബംഗാള്‍ സെമിയില്‍. ഇന്നലെ രാവിലെ നടന്ന മത്സരത്തില്‍ ബംഗാള്‍ എതിരില്ലാത്ത രണ്ട് ഗോളിന് ഡല്‍ഹിയെ പരാജയപ്പെടുത്തി.
88ാം മിനുട്ടില്‍ മാനവ് മല്ലിക്കും 90ാം മിനുട്ടില്‍ ആകാശ് ഓരോയുമാണ് വിജയ ഗോള്‍ നേടിയത്. ഇന്നലെ വൈകിട്ട് നടന്ന ഗ്രൂപ്പിലെ അവസാന മത്സരത്തില്‍ മേഘാലയ എതിരില്ലാത്ത മൂന്ന് ഗോളുകള്‍ക്ക് ഗോവയെ പരാജയപ്പെടുത്തി. മേഘാലയക്ക് വേണ്ടി 30, 34 മിനുട്ടുകളില്‍ ഗ്ലെന്നീസ് ഗോഡ് ഫ്രെലിന്റോ ഇരട്ട ഗോളുകളും 90ാം മിനുട്ടില്‍ ബെഞ്ചമിന്‍ മൂന്നാം ഗോളും സ്‌കോര്‍ ചെയ്തു.
ഗ്രൂപ്പില്‍ മേഘാലയ മൂന്ന് ജയവുമായി നേരത്തെ സെമിയുറപ്പാക്കിയിരുന്നു. എന്നാല്‍ ഗോവക്ക് ജയം അനിവാര്യമായിരുന്നു. ഗോവയും ബംഗാളും ഏഴ് വീതം പോയിന്റ് നേടി ഒപ്പത്തിനൊപ്പമായിരുന്നു. ബംഗാളും ഗോവയും പരസ്പരം മത്സരിച്ചപ്പോള്‍ ഇരു ടീമുകളും ഗോള്‍രഹിത സമനിലയില്‍ പിരിഞ്ഞിരുന്നു. ഗോള്‍ ശരാശരിയില്‍ ബംഗാള്‍ മുന്നിലെത്തി. ഇന്ന് മത്സരമില്ല.
നാളെ സെമി ഫൈനല്‍ മത്സരം നടക്കും. ആതിഥേയരായ കേരളം മേഘാലയേയും ബംഗാള്‍ മിസോറമിനേയും നേരിടും. 28നാണ് ഫൈനല്‍.