കണ്ണൂര്‍: യാത്രക്കാരെ കയറ്റി സര്‍വിസ് നടത്തുന്നതുമായി ബന്ധപ്പെട്ട തര്‍ക്കത്തിനിടെ ഓട്ടോറിക്ഷാ ഡ്രൈവറെ മറ്റു ഡ്രൈവര്‍മാര്‍ മര്‍ദിച്ചതായി പരാതി. കണ്ണൂര്‍ റെയില്‍വേ സ്റ്റേഷന്‍ റോഡില്‍ കക്കാട് സ്വദേശി അനസിനാണു മര്‍ദനമേറ്റത്. വെള്ളിയാഴ്ച വൈകുന്നേരമായിരുന്നു സംഭവം. റെയില്‍വേ സ്റ്റേഷന്റെ പടിഞ്ഞാറ് ഭാഗത്തെ റോഡില്‍ ഓട്ടോകള്‍ നിര്‍ത്തി യാത്രക്കാരെ കയറ്റുകയോ ഇറക്കുകയോ ചെയ്യരുതെന്നു തീരുമാനമുണ്ട്. ഗതാഗതകുരുക്ക് ഉണ്ടാകുന്നത് ഒഴിവാക്കാനാണ് ഇത്തരമൊരു നിര്‍ദേശം നടപ്പാക്കിയത്. റെയില്‍വേ സ്റ്റേഷനിലെ പ്രീപെയ്ഡ് സ്റ്റാന്‍ഡ് കേന്ദ്രീകരിച്ചേ യാത്രക്കാരെ കയറ്റാന്‍ പാടുള്ളൂ. എന്നാല്‍ അനസ് ഈ നിര്‍ദേശം ലംഘിച്ചതു മറ്റുള്ളവര്‍ ചോദ്യംചെയ്തതാണു സംഘര്‍ഷത്തില്‍ കലാശിച്ചത്. മര്‍ദനമേറ്റ അനസ് ജില്ലാ ആശുപത്രിയില്‍ ചികിത്സതേടി.