വിദ്യാനഗര്‍: വര്‍ഷങ്ങള്‍ക്കു മുമ്പ് കോഴ്‌സ് കഴിഞ്ഞു പോയ വിദ്യാര്‍ഥികള്‍ കോളജിലെത്തി വിദ്യാര്‍ഥികളെ റാഗിങിന്റെ പേരില്‍ അക്രമിക്കുന്നുവെന്ന് പരാതി.
കാസര്‍കോട് ഗവണ്‍മെന്റ് കോളജിലെ പൂര്‍വ വിദ്യാര്‍ഥികളില്‍ ചിലര്‍ രാവിലെ കോളജിലെത്തി ഒന്നാം വര്‍ഷ വിദ്യാര്‍ഥികളെ ക്രൂരമായി റാഗിങിനിരയാക്കുന്നുവെന്നാണ് ആരോപണം.
കോളജിലെ വിദ്യാര്‍ഥികളാണെന്ന ധാരണയില്‍ ഒന്നാം വര്‍ഷ വിദ്യാര്‍ഥികള്‍ പരാതിപ്പെടാനും ധൈര്യപ്പെടുന്നില്ല. ഈ വര്‍ഷത്തെ ഒന്നാം വര്‍ഷ ക്ലാസുകള്‍ തുടങ്ങി നാലു ദിവസമേ ആയിട്ടുള്ളൂവെങ്കിലും നിരവധി വിദ്യാര്‍ഥികള്‍ ഇവരുടെ റാഗിങിനു വിധേയരായതായി പരാതിയുണ്ട്. ഉച്ചയ്ക്കു കഴിക്കാന്‍ കൊണ്ടുവന്ന ഭക്ഷണം തട്ടിപ്പറിക്കലും പണം പിരിക്കലിലും തുടങ്ങി ക്രൂരമായ മാനസിക പീഡനവും തങ്ങള്‍ ഏല്‍ക്കേണ്ടി വന്നിട്ടുണ്ടെന്ന് വിദ്യാര്‍ഥികള്‍ പറയുന്നു.
വര്‍ഷങ്ങളായി തുടരുന്ന പൂര്‍വ വിദ്യാര്‍ഥികളുടെ വിളയാട്ടത്തിനെതിരേ നിരവധി പരാതി നല്‍കിയെങ്കിലും അധികൃതരുടെ ഭാഗത്തുനിന്നു നടപടികളൊന്നുമുണ്ടായിട്ടില്ലെന്നും ആരോപണമുണ്ട്.