കണ്ണൂര്‍: കോഴിക്കോട്, കണ്ണൂര്‍ ജില്ലകളില്‍ കടകളിലും സര്‍ക്കാര്‍ ഓഫിസുകളിലുമായി മുപ്പതോളം കവര്‍ച്ചകള്‍ നടത്തിയ കുപ്രസിദ്ധ മോഷ്ടാവ് കണ്ണൂരില്‍ അറസ്റ്റില്‍. കോഴിക്കോട് തിരുവമ്പാടി കൂടരഞ്ഞി സ്വദേശി കൊന്നുംതൊടിയില്‍ വീട്ടില്‍ ബിനോയ്(34) യെയാണ് കണ്ണൂര്‍ ടൗണ്‍ എസ്.ഐ ശ്രീജിത്ത് കൊടെരിയും സംഘവും പിടികൂടിയത്.
കണ്ണൂര്‍ നഗരത്തില്‍ മാത്രം 10 കവര്‍ച്ചാ കേസുകളില്‍ ഇയാള്‍ പ്രതിയാണ്. തലശേരി, നടക്കാവ്, കസബ തുടങ്ങിയ സ്ഥലങ്ങളിലും നിരവധി മോഷണങ്ങള്‍ നടത്തിയിട്ടുണ്ടെന്ന് പൊലിസ് പറഞ്ഞു. കണ്ണൂര്‍ കലക്ടറേറ്റില്‍ മോഷണം നടത്തി ജയിലില്‍ കഴിയവെ കഴിഞ്ഞ വര്‍ഷം ഡിസംബറില്‍ ജാമ്യത്തിലിറങ്ങിയാണ് വീണ്ടും മോഷണത്തില്‍ സജീവമായത്.
രാത്രി പട്രോളിങ്ങിനിടെ റെയില്‍വേ സ്റ്റേഷന്‍ പരിസരത്ത് നിന്നാണ് ടൗണ്‍ എ.എസ്.ഐമാരായ രാജീവന്‍, അനീഷ് കുമാര്‍ സി.പി.ഒമാരായ രഞ്ജിത്ത്, ലിജേഷ് എന്നിവരടങ്ങുന്ന സംഘം ഇയാളെ കമ്പിപ്പാര അടക്കമുള്ള ആയുധങ്ങള്‍ സഹിതം കസ്റ്റഡിയില്‍ എടുത്തത്.