അബൂദബി:എമിറേറ്റിൽ ഒലിയാൻഡർ ചെടികളുടെ ഉത്പാദനം, കൃഷി, പ്രചരിപ്പിക്കൽ, വ്യാപാരം എന്നിവ അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി നിരോധിച്ചു. അവ തൊടരുതെന്ന് പൊതുജനങ്ങൾക്ക് മുന്നറിയിപ്പ് നൽകി. താമസക്കാരെ, പ്രത്യേകിച്ച് കുട്ടികളെയും വളർത്തുമൃഗങ്ങളെയും സംരക്ഷിക്കുന്നതിനാണ് നടപടി സ്വീകരിച്ചതെന്ന് അതോറിറ്റി വക്തമാക്കി.

 ഈ വിഷ സസ്യത്തിന്റെ ഏതെങ്കിലും ഭാഗം കഴിക്കുന്നത് വിഷബാധ ഉണ്ടാവാൻ ഇടയാക്കും. പാറക്കെട്ടുകളിലും താഴ്വ‌രകളിലും സാധാരണയായി കാണപ്പെടുന്ന കുറ്റിച്ചെടിയാണ് ഒലിയാൻഡർ. കടുംപച്ച ഇലകളും ചടുലമായ പൂക്കളുമുള്ള ഇവയുടെ സൗന്ദര്യാത്മകത കാരണം പലപ്പോഴും റോഡരികിൽ നട്ടുപിടിപ്പിക്കാറുണ്ട്. എന്നാൽ ഈ ചെടിയുടെ ഇലകൾ, കാണ്ഡം, പൂക്കൾ, വിത്തുകൾ എന്നിവയുൾപ്പെടെ എല്ലാ ഭാഗങ്ങളിലും വിഷാംശംഅടങ്ങിയിട്ടുണ്ട്. ഹൃദയത്തെ ബാധിക്കുന്ന വിഷം ചെറിയ അളവിൽ പോലും അകത്ത് ചെല്ലുന്നത് ഓക്കാനം, ഛർദി, വയറിളക്കം, ക്രമര ഹിതമായ ഹൃദയമിടിപ്പ് തുടങ്ങിയ ഗുരുതരമായ ലക്ഷണങ്ങളിൽ കലാശിച്ചേക്കാം.

ഒലിയാൻഡർ ചെടികൾ സുരക്ഷിതമായി നീക്കം ചെയ്യാനും ഏതെങ്കിലും ലംഘനങ്ങൾ റിപ്പോർട്ട് ചെയ്യാനും അതോറിറ്റി പൗരന്മാരോടും താമസക്കാരോടും അഭ്യർഥിച്ചു. അറിയാത്ത ചെടികൾ തൊടുകയോ തിന്നുകയോ ചെയ്യരുത്. അബൂദബി ആരോഗ്യ വകുപ്പ് വിഷ സസ്യങ്ങളുടെ പട്ടികയിൽ ഈ ചെടിയെ ഉൾപ്പെടുത്തിയിട്ടുണ്ട്. പൊതു പാർക്കുകൾ, സംരക്ഷിത പ്രദേശങ്ങൾ, സ്‌കൂളുകൾ, മറ്റ് സ്ഥലങ്ങൾ എന്നിവിടങ്ങളിൽ ഒലിയാൻഡർ നട്ടുപിടിപ്പിക്കുന്നതിനെതിരെ കാലാവസ്ഥാ വ്യതിയാന പരിസ്ഥിതി മന്ത്രാലയവും മുന്നറിയിപ്പ് നൽകിയിട്ടുണ്ട്.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക