ചണ്ഡീഗഢ്: ഹരിയാനയില്‍ ബി.ജെ.പി മന്ത്രിസഭ ശനിയാഴ്ച അധികാരമേല്‍ക്കും. നയാബ് സിങ് സെയ്‌നി തന്നെയാകും ഹരിയാനയില്‍ മുഖ്യമന്ത്രിയാവുക. ഒന്നോ രണ്ടോ ഉപമുഖ്യമന്ത്രിമാര്‍ ഉണ്ടാകുമെന്നും സൂചനയുണ്ട്.

ഹരിയാനയില്‍ 90 അംഗ നിയമസഭയില്‍ 48 സീറ്റുകളാണ് ബി.ജെ.പി നേടിയത്. കോണ്‍ഗ്രസ് 36 സീറ്റുകളിലാണ് വിജയിച്ചത്. പ്രതികൂല ഘടകങ്ങള്‍ ഏറെയുണ്ടായിട്ടും സംസ്ഥാനത്ത് ബി.ജെ.പി മികച്ച വിജയം നേടിയത് നയാബ് സിങ് സെയ്‌നിയുടെ പ്രവര്‍ത്തന മികവുകൊണ്ടാണെന്നാണ് വിലയിരുത്തപ്പെടുന്നതും. അതുകൊണ്ടുതന്നെ മുഖ്യമന്ത്രി സ്ഥാനത്തേക്ക് മറ്റൊരു പേര് ഉയര്‍ന്നു വരാനും ഇടയില്ല. 

ഹരിയാനയില്‍ കോണ്‍ഗ്രസ് അധികാരത്തിലെത്തുമെന്നായിരുന്നു എക്‌സിറ്റ് പോള്‍ ഫലങ്ങള്‍ പറഞ്ഞത്. ആദ്യ ഫലസൂചനകളും അതുതന്നെയാണ് സൂചിപ്പിച്ചത്. ഭരണവിരുദ്ധ വികാരവും കര്‍ഷകരുടെയും ഗുസ്തി താരങ്ങളുടെയും അഗ്‌നിവീര്‍ അപേക്ഷകരുടെയും സമരങ്ങളും ഒന്നും പക്ഷേ കോണ്‍ഗ്രസിന് അനുകൂലമായില്ല. നഗരമേഖലയിലും ഗ്രാമങ്ങളിലും ഉണ്ടായ ജാട്ട് ഇതര വിഭാഗമാണ് ഹരിയാനയില്‍ ഇത്തവണ ബി.ജെ.പിക്ക് തുണയായത്. 

ജാട്ട് വിഭാഗങ്ങള്‍ അകന്നപ്പോള്‍ പിന്നാക്ക വിഭാഗങ്ങളെ കൂടെ നിര്‍ത്താനായതും സെയ്‌നിയുടെ നേട്ടമായി ദേശീയ നേതൃത്വം വിലയിരുത്തുന്നു. പ്രധാനമന്ത്രി നരേന്ദ്രമോദി കഴിഞ്ഞദിവസം സെയ്‌നിയെ പേരെടുത്ത് പറഞ്ഞ് അഭിനന്ദിച്ചിരുന്നു.