മലപ്പുറം: പെൺകുട്ടിയുടെ ചിത്രം എഡിറ്റ് ചെയ്ത് സമൂഹ്യമാധ്യമങ്ങളിലൂടെ പ്രചരിപ്പിച്ച കേസിൽ രണ്ട് പേർ പിടിയിലായി. രാമപുരം ജെംസ് കോളജ് വിദ്യാർഥിനിയായ 19 കാരിയുടെ പരാതിയിൽ കൊളത്തൂർ പൊലിസാണ് നടപടിയെടുത്തത്. തന്റെ ചിത്രം എഡിറ്റ് ചെയ്തു തെറ്റിദ്ധരിപ്പിക്കും വിധം സാമൂഹ്യമാധ്യങ്ങളിൽ പ്രചരിപ്പിക്കുന്നുവെന്ന് പെൺകുട്ടി പരാതി നൽകിയിരുന്നു.

ഇതേ തുടർന്നാണ് അരക്കുപറമ്പ് സ്വദേശി മുഹമ്മദ് സഞ്ജിത് അല്ലാമാ വാഫി (26), മൂന്നിയൂർ സ്വദേശി മുഹമ്മദ് ലിയാഉദ്ദീൻ വാഫി (33) എന്നിവരെ പൊലിസ് കസ്റ്റഡിയിലെടുത്തത്. ഏഴ് വർഷത്തിൽ താഴെ ശിക്ഷ ലഭിക്കാവുന്ന കുറ്റങ്ങളിൽ പ്രതികളായിട്ടുള്ളവരെ അന്വേഷണ ഉദ്യോഗസ്ഥന്റെ വിവേചനാധികാരത്തിൽ നോട്ടീസ് നൽകി വിട്ടയക്കാമെന്ന സുപ്രീം കോടതി നിർദേശമുള്ളതിനാൽ ഇരുവർക്കും കോടതിയിൽ ഹാജരാകാൻ നോട്ടിസ് നൽകി വിട്ടയച്ചു.

ഇവരിൽ നിന്നും മൊബൈൽ ഫോൺ പിടിച്ചെടുത്ത് കോടതിയിൽ സമർപ്പിച്ചിട്ടുണ്ട്. സ്ത്രീത്വത്തെ അപമാനിച്ചതിനുള്ള ഐ.പി.സി 509, സമൂഹമാധ്യമങ്ങളിലൂടെ തെറ്റായ പ്രചരണം നടത്തിയതിനുള്ള കേരള പൊലിസ് ആക്ട് (കെ.പി.എ 120-ഒ) തുടങ്ങിയ ഗുരുതര വകുപ്പുകളാണ് പ്രതികൾക്കെതിരേ ചുമത്തിയിട്ടുള്ളത്.

കേസിൽ ഉൾപ്പെട്ടിട്ടുള്ള കൂടുതൽ പ്രതികളെ കുറിച്ചുള്ള അന്വേഷണം പുരോഗമിച്ചുകൊണ്ടിരിക്കുകയാണ്. ഫേസ്ബുക്, വാട്‌സ്ആപ് തുടങ്ങിയ സാമൂഹ്യ മാധ്യമങ്ങളിൽ എഡിറ്റ് ചെയ്ത ചിത്രം പ്രചരിപ്പിച്ചവരെ കുറിച്ചുള്ള വിവരങ്ങൾ ശേഖരിക്കുന്നതിനായി പൊലിസ് നടപടി ആരംഭിച്ചിട്ടുണ്ട്. 
ഇത് ലഭ്യമാകുന്ന മുറക്ക് കേസിൽ ഉൾപ്പെട്ട കൂടുതൽ പ്രതികൾക്കെതിരേ നടപടി ഉണ്ടാവുമെന്ന് അന്വേഷണ ഉദ്യോഗസ്ഥൻ അറിയിച്ചു.