കൊച്ചി: ചാലക്കുടി മണ്ഡലത്തിലെ യു.ഡി.എഫ് സ്ഥാനാര്‍ഥി ബെന്നി ബഹനാന് വേണ്ടി വോട്ടു ചോദിച്ച് എം.എല്‍.എമാരായ വി.പി സജീന്ദ്രന്‍, എല്‍ദോസ് കുന്നപ്പിള്ളി, അന്‍വര്‍ സാദത്ത് എന്നിവര്‍ കുന്നത്ത്‌നാട് മണ്ഡലത്തില്‍ പര്യടനം നടത്തി. കടുത്ത വേനല്‍ച്ചൂടിന് ആശ്വാസമായി പെയ്ത കുളിര്‍മഴയിലും ആവേശം തെല്ലും ചോരാതെയായിരുന്നു എം.എല്‍.എമാരുടെ പര്യടനം.
രാവിലെ കൊച്ചിന്‍ റിഫൈനറിക്ക് മുന്നില്‍ നിന്ന് നൂറുകണക്കിന് ഐ.എന്‍.ടി.യു.സി പ്രവര്‍ത്തകര്‍ നല്‍കിയ ആവേശകരമായ സ്വീകരണം ഏറ്റു വാങ്ങിയാണ് എം.എല്‍.എ മാരുടെ മണ്ഡല പര്യടനം ആരംഭിച്ചത്.
അയ്യന്‍കുഴി, കരിമുകള്‍, പള്ളിമുകള്‍ പ്രദേശങ്ങളിലെല്ലാം നൂറുകണക്കിന് പ്രവര്‍ത്തകരാണ് എം.എല്‍.എമാര്‍ക്ക് പിന്തുണയുമായി എത്തിയത്. പാടത്തിക്കരയില്‍ മുസ്്‌ലിം ലീഗ് പ്രവര്‍ത്തകരും കോണ്‍ഗ്രസ് പ്രവര്‍ത്തകരും ചേര്‍ന്ന് വന്‍വരവേല്‍പ്പാണ് നല്‍കിയത്. വികസന പ്രശ്‌നങ്ങള്‍ ചൂണ്ടികാട്ടിയും തൃക്കാക്കര മണ്ഡലത്തില്‍ ബെന്നി ബഹനാന്‍ എം.എല്‍.എ ആയിരിക്കെ നടത്തിയ വികസന പ്രവര്‍ത്തനങ്ങള്‍ ചൂണ്ടികാട്ടിയും ആയിരുന്നു സ്ഥാനാര്‍ഥിക്ക് വേണ്ടിയുള്ള എം.എല്‍.എമാരുടെ വോട്ടു അഭ്യര്‍ഥന.
പിണര്‍മുണ്ടയില്‍ എത്തിയ എം.എല്‍.എമാരെ വാദ്യമേളങ്ങളോടെയാണ് സ്വീകരിച്ചത്. പള്ളിക്കര, പെരിങ്ങാല എന്നിവടങ്ങളിലെ സ്വീകരണ ശേഷം വൈകിട്ട് കിഴക്കമ്പലത്ത് പ്രവേശിച്ചതോടെ കോരിചൊരിയുന്ന മഴയായിരുന്നു ഇവിടെ പ്രചാരണ ജാഥ എത്തുമ്പോള്‍. ആവേശം ഒട്ടും ചോരാതെ പെരുമഴയത്തും പ്രവര്‍ത്തകര്‍ ബെന്നി ബഹനാന് വേണ്ടി വോട്ടഭ്യര്‍ഥനയുമായി മുന്നേറി. 'ബെന്നിച്ചേട്ടന്‍ വിശ്രമിക്കൂ, ഞങ്ങള്‍ തുടരാം' എന്ന മുദ്രാവാക്യവുമായാണ് എം.എല്‍.എമാര്‍ മണ്ഡല പര്യടനം നടത്തുന്നത്.