കൊച്ചി: ബാങ്ക് വായ്പയ്ക്കായി ജാമ്യം നിന്നതിനെ തുടര്‍ന്ന് ജപ്തിയുടെ പേരില്‍ ഒഴിപ്പിക്കാനുള്ള ഉത്തരവ് നടപ്പാക്കുന്നതിനു പ്രായോഗിക നിര്‍ദേശം സമര്‍പ്പിക്കാന്‍ സര്‍ക്കാരിനു ഹൈക്കോടതി മൂന്നാഴ്ചത്തെ സാവകാശം അനുവദിച്ചു. ആക്ടിങ് ചീഫ് ജസ്റ്റിസ് ഋഷികേശ് റോയി, ജസ്റ്റിസ് എ.കെ ജയശങ്കര്‍ നമ്പ്യാര്‍ എന്നിവരടങ്ങുന്ന ഡിവിഷന്‍ ബെഞ്ചാണ് സര്‍ക്കാരിന്റെ ആവശ്യം പരിഗണിച്ച് സമയം അനുവദിച്ചത്.
കളമശേരി പത്തടിപ്പാലത്തെ മാന്തോട്ടത്തില്‍ പ്രീത ഷാജിയുടെ വീട് ഒഴിപ്പിച്ച് വസ്തു ലേലത്തിലെടുത്ത വ്യക്തിക്ക് കൈമാറാന്‍ ഹൈക്കോടതി പുറപ്പെടുവിച്ച ഉത്തരവ് നടപ്പാക്കിയില്ലെന്ന കോടതിയലക്ഷ്യ ഹരജിയാണ് കോടതി പരിഗണിച്ചത്. ചീഫ് സെക്രട്ടറി, ആഭ്യന്തര സെക്രട്ടറി, ജില്ലാ കലക്ടര്‍ എന്നിവരെ കോടതി സ്വമേധയാ കക്ഷിയാക്കി നോട്ടിസ് പുറപ്പെടുവിച്ചു. മൂന്നാഴ്ചയ്ക്കകം പ്രായോഗിക നിര്‍ദേശം സമര്‍പ്പിക്കണമെന്നാണ് കോടതി നിര്‍ദേശിച്ചിട്ടുള്ളത്. കളമശേരി പൊലിസ് മതിയായ സംരക്ഷണം നല്‍കിയെങ്കിലും പ്രീത ഷാജിയും കുടുംബവും ദേഹത്ത് മണ്ണെണ്ണയൊഴിച്ച് ആത്മഹത്യ ചെയ്യുമെന്നു പ്രഖ്യാപിച്ചു നാട്ടുകാരുടെയും ചില സംഘടനകളുടെയും നേതൃത്വത്തില്‍ നടത്തിയ പ്രതിഷേധത്തെ തുടര്‍ന്നു ഒഴിപ്പിക്കല്‍ നടന്നിട്ടില്ലെന്നു സര്‍ക്കാര്‍ കോടതിയില്‍ അറിയിച്ചു. ബോധപൂര്‍വമായ വീഴ്ചയുണ്ടായിട്ടില്ലെന്നും സര്‍ക്കാര്‍ വിശദീകരിച്ചു. അഡ്വക്കറ്റ് കമ്മിഷണര്‍ക്ക് കോടതി നിര്‍ദേശ പ്രകാരം സംരക്ഷണം നല്‍കാന്‍ സിറ്റി പൊലിസ് കമ്മിഷണര്‍ 206 അംഗ സംഘത്തെയും ടിയര്‍ഗ്യാസ്, ആംബുലന്‍സ്, റൈഫില്‍ സംഘം എന്നിവരെയും നിയോഗിച്ചു. എന്നാല്‍ നാട്ടുകാര്‍ സംഘം ചേര്‍ന്നു തടസം സൃഷ്ടിച്ചുവെന്നും ഒഴിപ്പിക്കല്‍ ദുഷ്‌കരമാണെന്നും പ്രതിഷേധക്കാര്‍ ചിതയൊരുക്കി ദേഹത്ത് പെട്രോളും മണ്ണെണ്ണയും ഒഴിച്ച് ആത്മഹത്യക്ക് തയാറെടുത്തിരിക്കുകയാണെന്നും സ്ഥിതി ഗുരുതരമാണെന്നും രഹസ്യാന്വേഷണ റിപ്പോര്‍ട്ടുണ്ടെന്നും സര്‍ക്കാര്‍ അറിയിച്ചു.