കൊച്ചി: അഭിമന്യുവിന്റെ കൊലപാതകത്തിനുകാരണമായ മഹാരാജാസ് കോളജിലെ ചുവരെഴുത്തിനു ചില്ലിട്ടു. എസ്.എഫ്.ഐയുടെ നേതൃത്വത്തിലാണ് മഹാരാജാസ് കോളജിന്റെ കിഴക്കേ ഗേറ്റിന്റെ വലതു വശത്തുള്ള രണ്ടാമത്തെ പാളിയില്‍ ചുവന്ന ഫ്രെയിമിട്ട് വെള്ളം വീഴാത്ത വിധം റൂഫിട്ട് സംരക്ഷിച്ചത്. മതിലിനു മുഴുവനായി ചില്ലും ഇട്ടു. പണി പൂര്‍ത്തിയായിട്ടില്ല. പണി പൂര്‍ത്തിയാകുമ്പോള്‍ അഭിമന്യുവിന്റെ ആദ്യ രക്തസാക്ഷി സ്മാരകം കൂടിയാവുകയാണ് ഈ മതില്‍.

മതിലില്‍ കാംപസ് ഫ്രണ്ട് ചുമരെഴുതിയതിനെത്തുടര്‍ന്നാണ് പ്രശ്‌നങ്ങള്‍ ഉണ്ടായത്. ഇവര്‍ എഴുതിയതിനു മുകളില്‍ വര്‍ഗീയത തുലയട്ടെ എന്നെഴുതിയതിനാണ് കൊലപാതകം നടന്നത്. അഭിമന്യു മഹാരാജാസ് സ്മാരക മതിലായി ഇവിടം സംരക്ഷിക്കാനാണ് എസ്.എഫ്.ഐയുടെ തീരുമാനം. കോളജിനുള്ളില്‍ അഭിമന്യു സ്മാരകം സ്ഥാപിക്കാനും തയാറെടുക്കുകയാണ് ഇവര്‍.