ഗൂഡല്ലൂര്‍: ജനവാസ കേന്ദ്രങ്ങളില്‍ നാശം വിതച്ച കുരങ്ങുകളെ കൂടുവച്ചു പിടികൂടി. നീലഗിരി ജില്ലയിലെ മഞ്ചൂര്‍ താലൂക്കിന്റെ വിവിധ പ്രദേശങ്ങളിലെ ശല്യക്കാരായ കുരങ്ങുകളെയാണ് കൂട് വച്ച് പിടികൂടിയത്.
മഞ്ചൂര്‍ ഭാഗത്ത് കൃഷി നശിപ്പിക്കുന്നതും വീടിന് കേടുപാടുണ്ടാക്കുന്നതും പതിവായതോടെയാണ് നാട്ടുകാര്‍ പരാതിയുമായി രംഗത്തെത്തിയത്.
തുടര്‍ന്നാണ് വനം വകുപ്പിന്റെ നേതൃത്വത്തില്‍ കുരങ്ങുകളെ പിടികൂടാന്‍ ആരംഭിച്ചത്.  40ഓളം കുരങ്ങുകളെയാണ് പിടികൂടിയത്. ഇവയെ പിന്നീട് അപ്പര്‍ ഭവാനി വനത്തില്‍ വിട്ടയച്ചു.