ഉള്ള്യേരി: വിദേശമദ്യക്കടത്ത് വ്യാപകമായതോടെ വാഹനങ്ങളില്‍ പരിശോധന കര്‍ശനമാക്കി എക്‌സൈസ്. തെരഞ്ഞെടുപ്പ് ദിനം അടുത്തതോടെയാണ് എക്‌സൈസിന്റെ നേതൃത്വത്തില്‍ വാഹന പരിശോധന കര്‍ശനമാക്കിയത്.
അനധികൃതമായി കൈവശംവയ്ക്കുന്ന പണം, മദ്യം, ആയുധങ്ങള്‍ എന്നിവ കണ്ടുപിടിക്കുന്നതിനായി ജില്ലയില്‍ 39 സ്റ്റാറ്റിക് സര്‍വൈലന്‍സ് ടീമുകളുടെ പരിശോധനയ്ക്ക് പുറമെയാണ് എക്‌സൈസിന്റെ നേൃത്വത്തില്‍ പരിശോധന കര്‍ശനമാക്കിയത്. ബാലുശ്ശേരി റേയ്ഞ്ച് ഓഫിസിന്റെ നേതൃത്വത്തില്‍ ഉള്ള്യേരിയില്‍ നടത്തിയ വാഹന പരിശോധനയില്‍ ബസുകളില്‍ നിന്ന് വിദേശമദ്യം പിടിച്ചെടുത്തു. സഞ്ചിയിലും പ്ലാസ്റ്റിക് കവറിലുമായിരുന്നു മദ്യം കടത്തിയത്.പലതും ഉടമസ്ഥരില്ലാത്ത നിലയിലായിലായുരുന്നു. തെരഞ്ഞെടുപ്പ് ആകുമ്പോഴേക്കും മാഹിയില്‍ നിന്നു മദ്യം എത്തിച്ച് ശേഖരിക്കുന്നതിന് ശ്രമങ്ങള്‍ നടക്കുന്നതായുള്ള രഹസ്യവിവരത്തെ തുടര്‍ന്നാണ് എക്‌സൈസ് ബസുകളില്‍ പരിശോധന കര്‍ശനമാക്കിയത്.
ഇനി മുതല്‍ സ്‌ക്വാഡുകളായി തിരിച്ചായിരിക്കും പരിശോധനയുണ്ടാവുക. എക്‌സൈസ് ഇന്‍സ്‌പെകടര്‍ മനോജ് പടിക്കത്ത്, അസി. എക്‌സൈസ് ഇന്‍സ്‌പെകടര്‍ പത്മാനന്ദ്, സുജ, ശശി തുടങ്ങിയവരുടെ നേതൃത്വത്തിലായിരുന്നു പരിശോധന.