സിഡ്‌നി: ബിഗ് ബാഷ് ലീഗിൽ സെഞ്ച്വറി തിളക്കത്തിൽ സ്റ്റീവ് സ്മിത്ത്. സിഡ്‌നി സിക്സെഴ്സിന് വേണ്ടിയാണ് സ്മിത്ത് സെഞ്ച്വറി നേടി തിളങ്ങിയത്. പെർത്ത് സ്‌കോച്ചേഴ്സിനെതിരെ 64 പന്തിൽ പുറത്താവാതെ 121 റൺസാണ് സ്മിത്ത് നേടിയത്. 10 ഫോറുകളും ഏഴ് സിക്സുകളുമാണ് സ്മിത്ത് നേടിയത്.

ബിഗ് ബാഷ് ലീഗിലെ സ്മിത്തിന്റെ മൂന്നാം സെഞ്ച്വറി ആണിത്. ഇതോടെ ബിബിഎല്ലിൽ ഏറ്റവും കൂടുതൽ സെഞ്ച്വറി നേടിയ ബെൻ മക്‌ഡെർമോട്ടിന്റെ റെക്കോർഡിനൊപ്പമെത്താനും സ്മിത്തിന് സാധിച്ചു.

ട്വന്റി ട്വന്റിയിലെ സ്മിത്തിന്റെ നാലാം സെഞ്ച്വറി ആണിത്. ഇന്ത്യൻ പ്രീമിയർ ലീഗിൽ 2016ൽ റൈസിംഗ് പൂനെ സൂപ്പർ ജയൻ്റ്‌സിന് വേണ്ടിയാണ് സ്മിത്ത് ആദ്യ സെഞ്ച്വറി നേടിയത്. ഗുജറാത്ത് ലയൺസിനെതിരെ 54 പന്തിൽ 101 റൺസായിരുന്നു സ്മിത്ത് നേടിയത്. 

നവംബറിൽ നടന്ന ഇന്ത്യൻ പ്രീമിയർ ലീഗിന്റെ താരലേലത്തിൽ സ്മിത്തിനെ ഒരു ടീമും വാങ്ങിയിരുന്നില്ല. എന്നാൽ ഇപ്പോൾ തനിക്ക് ട്വന്റി ട്വന്റിയിൽ പലതും ചെയ്യാൻ സാധിക്കുമെന്ന് തെളിയിച്ചിരിക്കുകയാണ് സ്മിത്ത്. 
 
സ്മിത്തിന്റെ സെഞ്ച്വറിക്ക് പുറമെ മത്സരത്തിൽ സിഡ്‌നിക്കായി ക്യാപ്റ്റൻ മോയിസസ് ഹെൻറിക്കസ് 28 പന്തിൽ 46 റൺസും നേടി മികച്ച പ്രകടനം നടത്തി. ആറ് ഫോറുകളും ഒരു സിക്സുമാണ് താരം നേടിയത്. ബെൻ ദ്വാർഷുയിസ് ഏഴ് പന്തിൽ പുറത്താവാതെ 23 റൺസും നേടി. ഒരു ഫോറും മൂന്ന് സിക്സുകളുമാണ് താരം നേടിയത്.