ന്യൂഡല്‍ഹി: പരമാധികാരിയെന്ന് പറയുന്നു, എന്നിട്ട് ഒന്നും ചെയ്യുന്നില്ലേയെന്ന് ഡല്‍ഹി ഗവര്‍ണറോട് സുപ്രിംകോടതി. തലസ്ഥാനത്തെ മാലിന്യ പ്രശ്‌നത്തില്‍ പരിഹാരം കാണാത്ത ലഫ്റ്റനന്റ് ഗവര്‍ണര്‍ അനില്‍ ബായ്ജാലിനെയാണ് പരമോന്നത കോടതി രൂക്ഷമായി വിമര്‍ശിച്ചത്. മാലിന്യ നിര്‍മാര്‍ജനത്തിനുള്ള നടപടികള്‍ സ്വീകരിക്കുന്നതില്‍ വീഴ്ച വരുത്തിയതിനായിരുന്നു വിമര്‍ശനം. മാലിന്യ സംസ്‌കരണം പ്രാദേശിക ഭരണകൂടത്തിന്റെ ചുമതലയാണെന്നായിരുന്നു ഗവര്‍ണറുടെ നിലപാട്.
ജസ്റ്റിസ്മാരായ എം.ബി ലോകൂര്‍, ദീപക് ഗുപ്ത എന്നിവരുടെ ബെഞ്ചാണ് ഗവര്‍ണറുടെ നിലപാടിനെ വിമര്‍ശിച്ചത്. മാലിന്യ നിര്‍മാര്‍ജനം ലക്ഷ്യമിട്ട് ഗവര്‍ണര്‍ പ്രത്യേക സമിതിയെ വിളിച്ചു ചേര്‍ക്കാത്തതിനും കോടതി അദ്ദേഹത്തെ ശകാരിച്ചു. നിങ്ങള്‍ പറയുന്നു ഞാനാണ് അധികാരിയെന്ന്. എന്നാല്‍ നിങ്ങള്‍ ഒന്നും തന്നെ ചെയ്യുന്നില്ല, നിങ്ങള്‍ കരുതുന്നുണ്ടോ നിങ്ങളാണ് പരമാധികാരിയെന്ന് ' ഗവര്‍ണറോട് ജസ്റ്റിസുമാര്‍ ചോദിച്ചു. മുഖ്യമന്ത്രി അരവിന്ദ് കെജ്‌രിവാളിനെ ഇക്കാര്യത്തില്‍ കുറ്റപ്പെടുത്താന്‍ ഗവര്‍ണര്‍ക്കു സാധിക്കില്ലെന്നും കോടതി വ്യക്തമാക്കി.
മുനിസിപ്പല്‍ കോര്‍പറേഷനുമേല്‍ അധികാരമുള്ള ഗവര്‍ണറുടെ ഓഫിസ് മാലിന്യ വിഷയത്തില്‍ പരിഹാരം കാണാത്തതില്‍ കോടതി നീരസം പ്രകടിപ്പിച്ചു. നഗരത്തിലെ മൂന്നു സ്ഥലങ്ങളിലായി കുന്നുകൂടിക്കിടക്കുന്ന മാലിന്യ കൂമ്പാരങ്ങള്‍ ഉടന്‍ നീക്കണമെന്നും കോടതി ഉത്തരവിട്ടു.
ഒക്‌ല, ബല്‍സ്വ, ഖാസിപൂര്‍ എന്നീ മേഖലകളിലെ മാലിന്യം നീക്കാനാണ് കോടതി ഉത്തരവിട്ടത്. ശുചീകരണ തൊഴിലാളികള്‍ക്ക് തിരിച്ചറിയില്‍ കാര്‍ഡും യൂനിഫോമും നല്‍കണമെന്നും കോടതി പറഞ്ഞു. ലെഫ്. ഗവര്‍ണര്‍ക്കാണോ സര്‍ക്കാരിനാണോ കൂടുതല്‍ അധികാരമെന്ന വിഷയത്തില്‍ ഡല്‍ഹി സര്‍ക്കാരിന് അനുകൂലമായ വിധി സുപ്രിംകോടതിയില്‍ നിന്ന് അടുത്തിടെ ഉണ്ടായിരുന്നു. വീണ്ടും ഗവര്‍ണര്‍ക്ക് തിരിച്ചടിയായാണ് കഴിഞ്ഞ ദിവസത്തെ കോടതി വിധിയുണ്ടായത്.