ചവറ: ദേശീയപാതയില്‍ ഇടപ്പള്ളിക്കോട്ട പോരൂക്കരയ്ക്ക് സമീപം കാറുകള്‍ തമ്മില്‍ കൂട്ടിയിടിച്ചുണ്ടായ അപകടത്തില്‍ ബൈക്ക് യാത്രികര്‍ക്കു പരുക്കേറ്റു. അപകടത്തില്‍പെട്ട കാറുകളിലൊന്ന് നിയന്ത്രണം തെറ്റി ബൈക്കില്‍ തട്ടുകയായിരുന്നു.  ബൈക്ക് യാത്രികരായവെറ്റമുക്ക് സ്വദേശികളായ അച്ഛനും മകനും പരുക്കേറ്റു.
ചൊവ്വാഴ്ച രാത്രി എട്ടു മണിയോടെയായിരുന്നു അപകടം. എറണാകുളത്ത് നിന്നും തിരുവനന്തപുരത്ത് നിന്നും  വരികയായിരുന്ന കാറുകള്‍ തമ്മില്‍ കൂട്ടിയിടിക്കുകയായിരുന്നു. അരികിലൂടെ വരികയായിരുന്ന ബൈക്കില്‍ അപകടത്തില്‍ പെട്ട കാറിലൊന്ന് വന്നിടിക്കുകയായിരുന്നു.  ഇതിനിടയില്‍ സമീപത്തുള്ള തട്ടുകടക്ക് മുന്നില്‍ പാര്‍ക്ക് ചെയ്തിരുന്ന ലോറിയില്‍ കാര്‍ ഇടിച്ച് നിന്നത് വന്‍ അപകടമൊഴിവാക്കി.  
അപകടത്തില്‍ ഇരുകാറുകളുടെയും മുന്‍വശം  പൂര്‍ണമായും തകര്‍ന്നു. വാഹനത്തിലെ എയര്‍ ബാഗ് കാരണമാണ് കാര്‍ യാത്രികര്‍ പരിക്കേല്‍ക്കാതെ രക്ഷപെട്ടത്.  അപകടത്തെ തുടര്‍ന്ന് ദേശീയ പാതയില്‍ ഗതാഗതം പൂര്‍ണമായും തടസപ്പെട്ടു.  ചവറ ഫയര്‍ഫോഴ്‌സ്, പൊലിസ് എന്നിവരെത്തി വാഹനങ്ങള്‍ നീക്കം ചെയ്താണ് ഗതാഗതം പുനഃസ്ഥാപിച്ചത്.