ന്യൂഡല്‍ഹി: സ്വവര്‍ഗ ലൈംഗികത ക്രിമിനല്‍ കുറ്റമാക്കുന്ന ഇന്ത്യന്‍ ശിക്ഷാനിയമത്തിലെ 377ാം വകുപ്പ് റദ്ദാക്കണമെന്ന ഒരുകൂട്ടം ഹരജികളില്‍ വാദംനടക്കവെ വിഷയത്തില്‍ കക്ഷിചേരില്ലെന്ന് അഖിലേന്ത്യാ മുസ്‌ലിം വ്യക്തിനിയമ ബോര്‍ഡ് അറിയിച്ചു. വിഷയത്തില്‍ കോടതി എന്തുനിലപാട് സ്വീകരിച്ചാലും അതിനെ അംഗീകരിക്കുമെന്നും പിന്നീട് നിയമനടപടിക്കു നില്‍ക്കില്ലെന്നും ബോര്‍ഡ് നിര്‍വാഹക സമിതിയംഗം യൂസുഫ് ഹാതിം മുചല്ല പറഞ്ഞു.
ഇസ്‌ലാമിക നിയമപ്രകാരം സ്വവര്‍ഗരതി കുറ്റകരമാണെങ്കിലും ഇക്കാര്യത്തിലുള്ള കേസ് നടപടികളില്‍ ഇടപെടുന്നില്ലെന്നും അദ്ദേഹം അറിയിച്ചു. നേരത്തെ സ്വവര്‍ഗരതി സംബന്ധിച്ച് ഡല്‍ഹി ഹൈക്കോടതി മുന്‍പാകെയുണ്ടായിരുന്ന കേസില്‍ 377 ാംവകുപ്പ് നിലനിര്‍ത്തണമെന്നാവശ്യപ്പെട്ട് ബോര്‍ഡും കക്ഷിചേര്‍ന്നിരുന്നു. ചീഫ്ജസ്റ്റിസ് ദീപക് മിശ്ര അധ്യക്ഷനായ അഞ്ചംഗ ഭരണഘടനാ ബെഞ്ച് മുന്‍പാകെ ഇതുസംബന്ധിച്ച ഹരജികളില്‍ വാദംകേട്ടുവരികയാണ്.