തിരുവനന്തപുരം: വയനാട്ടില്‍ ജനവിധി തേടുന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കു വോട്ടഭ്യര്‍ഥിക്കാന്‍ മുന്‍ അധ്യക്ഷ സോണിയാ ഗാന്ധി വയനാട്ടിലേക്കില്ല. ആരോഗ്യ പ്രശ്‌നങ്ങള്‍ കാരണമാണ് പങ്കെടുക്കാന്‍ കഴിയാത്തതെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ നേതൃത്വം നല്‍കുന്ന പ്രചാരണ കമ്മിറ്റിക്ക് അറിയിപ്പ് ലഭിച്ചു.
മുന്‍ പ്രധാനമന്ത്രി മന്‍മോഹന്‍ സിങും വയനാട്ടില്‍ പ്രചാരണത്തിനെത്തില്ല. അതേസമയം അടുത്തയാഴ്ച അവസാനം പ്രിയങ്കാ ഗാന്ധി വയനാട്ടിലെത്തി റോഡ് ഷോകളില്‍ പങ്കെടുക്കും. രാഹുല്‍ ഗാന്ധി 17ന് മുഴുവന്‍ ദിവസവും വയനാടിനു വേണ്ടി മാറ്റിവച്ചിട്ടുണ്ട്. 16ന് തിരുവനന്തപുരത്തെത്തുന്ന രാഹുല്‍ ശശി തരൂരിന്റെ പ്രചാരണ പരിപാടിയില്‍ പങ്കെടുക്കും. തുടര്‍ന്ന് മാവേലിക്കരയില്‍ കൊടിക്കുന്നില്‍ സുരേഷിന്റെയും ആലപ്പുഴയില്‍ ഷാനിമോള്‍ ഉസ്മാന്റെയും പ്രചാരണ പരിപാടികളില്‍ പങ്കെടുക്കും.
പത്തനംതിട്ടയില്‍ ആന്റോ ആന്റണിക്ക് വേണ്ടിയും ഇടുക്കിയില്‍ ഡീന്‍ കുര്യാക്കോസിനു വേണ്ടിയും പാലക്കാട് വി.കെ ശ്രീകണ്ഠനു വേണ്ടിയും രാഹുലിനെ പ്രചാരണ പരിപാടികളിലെത്തിക്കാന്‍ ശ്രമം നടത്തുന്നുണ്ട്. എന്നാല്‍ ഇതുവരെ എസ്.പി.ജി അനുമതി നല്‍കിയിട്ടില്ല. മാവേലിക്കരയിലും ആലപ്പുഴയിലും തിരുവനന്തപുരത്തും പൊതുപരിപാടികള്‍ നടത്താനാണ് എസ്.പി.ജി ഇപ്പോള്‍ അനുമതി നല്‍കിയിരിക്കുന്നത്. ഇവിടെ റോഡ് ഷോ ഒരുക്കാനാണ് കെ.പി.സി.സി നേതൃത്വം ശ്രമിക്കുന്നത്.
16ന് രാത്രി കല്‍പ്പറ്റയിലായിരിക്കും രാഹുല്‍ താമസിക്കുക എന്നാണ് സൂചന. എന്നാല്‍ മാവോയിസ്റ്റ് ഭീഷണി കണക്കിലെടുത്ത് ഇതുവരെ എസ്.പി.ജി അനുമതി നല്‍കിയിട്ടില്ല. മാനന്തവാടിയിലും വണ്ടൂരിലും നിലമ്പൂരിലും റോഡ് ഷോ നടത്താനാണ് തീരുമാനിച്ചിരിക്കുന്നതെങ്കിലും എസ്.പി.ജിയുടെ എതിര്‍പ്പ് കണക്കിലെടുത്ത് മാനന്തവാടിയിലെ റോഡ് ഷോ പൊതുപരിപാടിയാക്കി മാറ്റാനാണ് തീരുമാനം.